Qytaı áýejaıynda esirtkini aǵzasyna jasyrǵan jolaýshy ustaldy

ASTANA. KAZINFORM — Qytaı áýejaıynda sheteldik azamat esirtkini aǵzasyna jasyryp, kedennen ótpek boldy, dep habarlaıdy CNS aqparat agenttigi. 

Qytaı astanasy Beıjińdegi áýejaı kedenshileri esirtkini aǵzasyna jasyryp, zańsyz tasymaldaǵan sheteldik azamatty ustady. Qylmyskerden 123 dana kapsýla tárkilenip, olardyń jalpy salmaǵy 1,58 keliden asty. Bul sońǵy bes jylda anyqtalǵan eń úlken esirtki tasymaly bolyp tur.

Áýejaıda reıs jolaýshylaryn tekserý kezinde kúdikti er adamnyń keden deklaratsııasyna eshqandaı júk týraly málimet bermegeni jáne onyń mazasyz áreketteri qyzmetkerlerdiń nazaryn aýdardy.

Suraq-jaýap pen tekserý nátıjesinde onyń ishine esirtki jasyrǵany anyqtaldy. Ol dereý tekserý qyzmetine jetkizilip, dárigerlik baqylaýǵa alyndy. Keıin ol birneshe ret aǵzasynan esirtki kapsýlalaryn shyǵardy. Saraptama bul kapsýlalardyń ishinde joǵary sapaly kokaın bar ekenin rastady. 

Adam aǵzasynda esirtki tasymaldaý — qylmyskerler jıi qoldanatyn qaýipti ádis. Esirtki kapsýlalary asqazan qyshqylynan zaqymdanyp, jarylsa, adam aǵzasyna ýly zat tarap, ólimge deıin ákelýi múmkin.

Qytaı zańdary esirtki tasymalyna qatań qaraıdy. Zań boıynsha esirtki tasymaldaý nemese satýmen aınalysqan adam kez kelgen jaǵdaıda qylmystyq jaýapqa tartylady. Kúdiktiler uzaq merzimge bas bostandyǵynan aıyrylyp, tipti ólim jazasyna kesilýi múmkin.

Buǵan deıin Qytaıdyń qorǵanys mınıstri sybaılas jemqorlyqqa qatysy bar degen kúdikke ilingeni belgili boldy.