Qytaıda bókenderdi baqylaıtyn robot-kıik jasaldy

ASTANA. KAZINFORM —  Qytaılyq kompanııa túr-tulǵasy tıbet bókeninen aýmaıtyn tórt aıaqty robot jasap shyǵardy. Ol qazirdiń ózinde bóken úıirine qosylyp, túz taǵylaryn jaqynnan sýretke túsirip júr. Ǵalymdardyń aıtýynsha, bul tájirıbe jabaıy janýarlardyń tirshiligin etene baqylap, shynaıy beınejazba men fotoderekter jınaýǵa jol ashady.

Lianhe Zaobao basylymynyń habarlaýynsha, jer betindegi alǵashqy «robot-kıik» jýyrda Tıbet jotasyndaǵy Kókshil qoryǵynda synaqtan ótkizilgen.

Bul qurylǵy Qytaıdyń belgili kompanııasy ázirlegen Jueying X30 tórt aıaqty roboty negizinde jasalǵan. Ol jasandy ıntellekt arqyly oqytylǵan, qarly dala, sazdy alqap, shól jáne ózen sekildi kúrdeli jer bederine beıimdelgen. Onyń túr-túsi men tulǵasy tıbet bókenine uqsaıdy, tek júrisi dala taǵysyndaı jeńil ári shapshań emes.

Tıbet bókeni adamnan qatty saqtanatyndyqtan, olardy jaqynnan baqylaý múmkin emes. Al «robot-kıik» Kókshildiń kúrdeli tabıǵatyna beıimdelgendikten, úıirlerdi erkin aralap, janýarlardy kedergisiz baqylaýǵa múmkindik beredi.

Ǵalymdar bul jańalyq tıbet bókenin zertteýdegi shekteýlerdi eńserip, túz taǵylarynyń minez-qulqy men tirshilik daǵdysyn anyqtaýǵa anaǵurlym naqty ári senimdi derekter beredi dep otyr.

Arǵy bettegi aǵaıyn «jorǵa» dep atap ketken tıbet bókeni – Qytaıda birinshi sanattaǵy qorǵalatyn janýarlardyń biri. Olar negizinen Tsınhaıdaǵy «Úsh qaınar» aımaǵyn, Tıbettegi Changtan jotasyn jáne Shynjańdaǵy Altyntaý qaptalyn meken etedi. Jyl saıyn jazǵy salym Kókshildegi Jono kóliniń mańyna toptalyp, tóldeıdi. Tabıǵattyń bul erekshe qubylysy tuıaqtylardyń jer betindegi eń aýqymdy qozǵalysy retinde baǵalanady.

Buǵan deıin Qytaıda kerqulan sanynyń 900-den asqany týraly jazǵan edik.