Qytaıda BQO kompanııalarynyń keńseleri ashylady
ASTANA. KAZINFORM – Qytaı Halyq Respýblıkasyna jumys sapary aıasynda Batys Qazaqstan oblysynyń ákimi Narıman Tóreǵalıev Tszıansý provıntsııasynyń iri óndiristik jáne saýda konglomerattarynyń biri — Jiangsu SOHO Holding Group memlekettik korporatsııasynyń basshylyǵymen kezdesý ótkizdi.
Іs-shara Memleket basshysy Qasym-Jomart Toqaev erekshe nazar aýdaratyn Qazaqstan men Qytaı arasyndaǵy óńiraralyq baılanysty nyǵaıtý aıasynda ótti. Prezıdent eki el arasyndaǵy strategııalyq seriktestikti tereńdetýdiń mańyzdy quraly retinde óńirlerdiń tikeleı yntymaqtastyǵyn damytý qajettigin únemi atap ótedi.
Jiangsu SOHO Holding Group 380-nen astam kásiporyndy biriktirip, halyqaralyq saýda, logıstıka, toqyma ónerkásibi, «aqyldy» óndiris jáne qarjylandyrý salasynda aýqymdy jobalardy júzege asyrady. Kompanııanyń syrtqy ekonomıkalyq operatsııalarynyń jyldyq kólemi 11 mıllıard AQSh dollarynan asady, geografııasy 160-tan astam eldi qamtıdy.
Kezdesý barysynda taraptar kelesi baǵyttar boıynsha yntymaqtastyq múmkindikterin talqylady:
- BQO ónimderin SOHO saýda alańdaryna jetkizý;
- «Qytaı – Ortalyq Azııa – Eýropa» baǵyty boıynsha logıstıkalyq toraptardy Qazaqstanda ornalastyrý;
- Qytaı tarapynyń aýyl sharýashylyǵy ónimderin qaıta óńdeýge jáne saqtaý, ótkizý ınfraqurylymyn damytýǵa qatysýy.
SOHO-nyń Azııa, Eýropa jáne Taıaý Shyǵys elderindegi kóterme jáne bólshek saýda arnalary jelisi arqyly Batys Qazaqstan oblysynyń ónimderiniń eksportyn ilgeriletý bastamasy erekshe qyzyǵýshylyq týdyrdy. Kompanııa basshylyǵy Batys Qazaqstan oblysynyń bıznes ókilderine tegin keńse bólmesin berýge daıyn ekenin bildirdi.
Kelissózder qorytyndysy boıynsha ınvestıtsııalyq usynystardy daıyndaý úshin naqty sala deńgeıinde qosymsha konsýltatsııalar ótkizý týraly kelisimge qol jetkizildi.
Oblys ákimi Jiangsu SOHO Holding Group sııaqty joǵary tehnologııalyq jáne halyqaralyq naryqqa baǵyttalǵan seriktestermen yntymaqtastyqty odan ári tereńdetý Qazaqstannyń Qytaı men Eýrazııa elderi arasyndaǵy senimdi ekonomıkalyq kópir retindegi ustanymyn nyǵaıtýǵa septigin tıgizetinine senim bildirdi.
Bul kezdesý Qazaqstan Respýblıkasynyń Qytaı Halyq Respýblıkasyndaǵy Elshiliginiń qoldaýymen uıymdastyryldy.