Qytaıda avtokólikterdi ózindik qunynan tómen baǵamen satýǵa tyıym salyndy
ASTANA. KAZINFORM – Qytaı bıligi jańa avtokólikterdi óndiristiń ózindik qunynan tómen baǵamen satýǵa resmı túrde tyıym saldy. Shekteýler jeńildikter men sýbsıdııalardyń barlyq túrine qatysty. Bul týraly South China Morning Post habarlaıdy.
QHR Naryqty retteý jónindegi memlekettik basqarmasy «Avtomobıl salasyndaǵy baǵa belgileý erejelerin saqtaý jónindegi nusqaýlyqty» jarııalady. Qujatta avtokontsernderdiń birqatar áreketteri dempıng retinde jiktelip, mundaı tásilderdi qoldanǵan kompanııalar eleýli quqyqtyq táýekelderge tap bolatyny eskertilgen.
Nusqaýlyqqa sáıkes, avtokontsernderge jańartylǵan modelderdi bazalyq nusqalardyń baǵasymen satýyna, eger qorytyndy baǵa óndiris shyǵyndarynan tómen bolsa, jeńildik nemese sýbsıdııa usynýyna, sondaı-aq básekelesterdi yǵystyrý nemese naryqta ústem jaǵdaıǵa ıe bolý úshin dempıngtik tetikterdi qoldanýyna tyıym salynady.
Atalǵan ádister qytaılyq avtokontsernder tarapynan baǵany tikeleı tómendetýdiń balamasy retinde paıdalanylyp kelgen. Ótken jyly el ekonomıkasyndaǵy deflıatsııa jaǵdaıynda retteýshiler naryq qatysýshylaryn «baǵa soǵysyn» toqtatýǵa birneshe ret shaqyrǵan. Sebebi bul úrdis kóptegen óndirýshilerdi tabys tabý múmkindiginen aıyrǵan.
Shanhaıdaǵy Wan Zhuo Auto dılerlik ortalyǵynyń satý jónindegi dırektory Chjao Chjen jańa erejeler bıyl avtokólikke degen suranysty báseńdetýi múmkin ekenin aıtty. Onyń pikirinshe, satý salyǵy boıynsha jeńildikterdiń birtindep toqtatylýy jetkizilim kóleminiń azaıýyna áser etedi.
Buǵan deıin elektromobıl satyp alýshylar 10 paıyzdyq satyp alý salyǵynan tolyq bosatylǵan edi. Endi olar 5 paıyz salyq tóleıdi, óıtkeni Beıjiń salyqtyq yntalandyrý baǵdarlamasyn kezeń-kezeńimen toqtatyp jatyr. 2028 jylǵa qaraı satyp alý salyǵynyń mólsherlemesi standartty 10 paıyzǵa qaıta oralady.
Eske salaıyq, Qytaıdyń 6 dóńgelekti kóligi Antarktıkada 10 myń shaqyrymnan astam jol júrip ótti.