Qytaıda 17 jańa mamandyq paıda boldy
ASTANA. KAZINFORM Qytaı Halyq Respýblıkasynda 17 jańa mamandyqtyń resmı túrde paıda bolǵany týraly QHR-dyń Adam resýrstary jáne áleýmettik qamsyzdandyrý mınıstrligi málimdedi, dep habarlaıdy Kazinform agenttiginiń menshikti tilshisi.
Jańa mamandyqtar tizimine shekaraaralyq elektrondyq kommertsııa boıynsha menedjer, drondar tobymen ushýdy josparlaýshy, elektrondyq shemalar ázirleýshi jáne basqa da qyzmetter kiredi.
Mınıstrlik sonymen qatar sońǵy jyldardaǵy eń aýqymdy jańartý aıasynda 42 jańa jiktelgen jumys túrin jarııalady. Olardyń qatarynda generatıvti jasandy ıntellekt júıelerin synaý, sondaı-aq ıntellektýaldy qoıma operatsııalary men tehnıkalyq qyzmet kórsetý sııaqty jumystar bar.
Qytaı bıligi alǵash ret resmı jańa mamandyqtar tizimin 2018 jyly jarııalaǵan bolatyn. 2019 jyldan 2024 jylǵa deıin 93 jańa qyzmet engizildi.
Qytaı Halyq Respýblıkasynyń Memlekettik keńesiniń (úkimet) 2025 jylǵa arnalǵan jumys esebinde bıyl qalalarda 12 mıllıonnan astam jańa jumys ornyn qurý mindeti qoıylǵan. Zertteýlerge sáıkes, qalalardaǵy jumyssyzdyq deńgeıi shamamen 5,5% bolýy tıis.
Aıta ketelik qytaılyqtardyń 70 paıyzy salmaq tastaǵysy keletini týraly jazǵan edik.