Qytaı jastarynyń salaýatty ómir saltyna qyzyǵýshylyǵy artyp keledi

ASTANA. KAZINFORM — Qytaıdaǵy elektrondyq kommertsııa platformalarynda jastar, ásirese jas qyzdar, densaýlyqty saqtaý ónimderiniń basty tutynýshylaryna aınalǵan, dep habarlaıdy Sınhýa.

Dástúrli qytaı medıtsınasy (DQM) aýrýhanalarynda «ulttyq densaýlyqty nyǵaıtatyn ónimder», sonyń ishinde tsýkat qosylǵan tátti kúrish botqasy — babaofan, jastar arasynda keń tanymal. Immýnıtetti kúsheıtetin ártúrli ónimder de jastar úshin «tórtinshi asqa» aınalyp keledi.

Mundaı úrdister Qytaı úshin jańalyq emes. Jas qytaılyqtar densaýlyqqa kóbirek kóńil bólip, jańa saýyqtyrý trendin qalyptastyryp jatyr.

Aǵa býynnyń densaýlyqty saqtaýǵa qatysty dástúrli tásilderinen aıyrmashylyǵy — jastar tek «ystyq sý iship» nemese «ımmýnomodýlıatorlardy qabyldap» qoımaı, salaýatty ómir saltyn kúndelikti ómirleriniń barlyq salasyna engizýge tyrysady.

Qytaı qoǵamdyq ǵylymdar akademııasynyń Azyq-túlik jáne farmatsevtıka ónerkásibin damytý jáne qadaǵalaý ǵylymı-zertteý ortalyǵynyń basshysy Chjan ıÝntszıanniń aıtýynsha, bilim deńgeıiniń artýy, densaýlyq saqtaý salasyndaǵy ǵylymı aqparattarǵa qoljetimdiliktiń jeńildeýi jáne sozylmaly aýrýlardyń jasarý úrdisi jastardy densaýlyqtaryna kóbirek kóńil bólýge ıtermelep otyr.

Qytaı ónerkásiptik zertteý ınstıtýtynyń málimetinshe, 15-25 jas aralyǵyndaǵy jastar densaýlyqty saqtaý naryǵynyń negizgi tutynýshylaryna aınalǵan, al bul saladaǵy ádister barǵan saıyn ártaraptandyrylyp keledi.

Sońǵy ýaqytta qytaılyq Veıbo áleýmettik jelisinde «DQM salonynyń tanymaldyǵy sútti shaı satatyn oryndardan asyp tústi» degen heshteg trendke aınaldy. Jastardyń talǵamyn eskere otyryp, keıbir DQM dárihanalary sút qosylǵan arnaıy shaılar men qyshqyl órik sorpasyn ázirlep, olardy shıpaly taǵamdarmen birge usyna bastady.

Sychýan provıntsııasynyń (Ońtústik-batys Qytaı) Chendý qalasyndaǵy Birinshi halyqtyq aýrýhana jyl mezgiline saı DQM tásilderine negizdelgen arnaıy emdik taǵamdardy satady.

— Kýrkýma men darshyn qosylǵan sútti shaı jastarǵa qatty unaıdy, — dedi aýrýhananyń klınıkalyq dıetologııa bóliminiń orynbasary Lıý ıAn.

Jastardyń salaýatty ómir saltyna qyzyǵýshylyǵy artqan saıyn, densaýlyq saqtaý ónimderi ındýstrııasy da belsendi damyp keledi. iiMedia Research marketıng agenttiginiń esebine sáıkes, sońǵy bes jylda bul naryq turaqty túrde ósip otyr. 2027 jylǵa qaraı onyń kólemi 423,7 mıllıard ıýanǵa (shamamen 59,1 mıllıard AQSh dollary) jetedi dep kútiledi.

— Satyp alýshylar sútti shaıdy tańdaǵanda, qant pen maı mólsheri az, quramynda ne bar ekeni anyq kórsetilgen ónimderdi qalaıdy, — deıdi Tszılın provıntsııasynyń Chanchýn qalasyndaǵy kondıterlik dúken qyzmetkeri. 

Onyń aıtýynsha, iri brendter paıdaly ıngredıentterdi qoldanýǵa kóbirek kóńil bóle bastady, al olardyń ónimderi durys tamaqtanýdy ustanatyn jastar arasynda keń suranysqa ıe.

Budan bólek, ǵylymı-tehnıkalyq quraldar da jastarǵa densaýlyqty nyǵaıtýda kómek kórsetip keledi. Mysaly, aqyldy bilezikter sııaqty densaýlyqty tekserýge arnalǵan qurylǵylardyń keń taralýy jeke densaýlyqty baqylaýdy jeńildetip, tıimdiligin arttyrǵan.

2024 jyldyń birinshi toqsanyndaǵy málimet boıynsha, Qytaı naryǵynda kıiletin qurylǵylardyń jetkizilimi 36,2%-ǵa ósip, 33,67 mıllıonǵa jetken. Keıbir aqyldy saǵat júrek soǵysy men qannyń ottegimen qanyǵý deńgeıin baqylaý sııaqty densaýlyqqa qatysty keńeıtilgen fýnktsııalarǵa ıe bola bastady.

— Densaýlyqty saqtaý burynǵydaı jaı keńes emes, qazirgi jastar úshin kúndelikti ómirdiń sanaly ári estetıkalyq bir bóligine aınaldy, — dedi «Tszınaıtan» densaýlyq menedjmenti kompanııasynyń bas dırektory Lıý Tszıýnkan.

Onyń aıtýynsha, jastar arasynda densaýlyqty saqtaýǵa baılanysty úsh negizgi úrdis baıqalady: jeke kún tártibin derekter negizinde retteý, dástúrli emdeý ádisterin zamanaýı turǵydan qaıta paıymdaý jáne densaýlyqty saqtaýdyń jaǵymdy ári tıimdi tájirıbesine basymdyq berý. Bul úrdister eldegi densaýlyq saqtaý ındýstrııasynyń qurylymyn ózgertip jatyr.

Buǵan deıin qytaılyq oıynshyq óndirýshi Labubu-dyń naryqtaǵy quny «Gazpromnan» asyp túskenin jazǵanbyz.