Qytaı jańa iPhone 17 smartfondaryn álemge eksporttaýǵa daıyndalyp jatyr

ASTANA. KAZINFORM — Apple kompanııasynyń jańa iPhone 17 serııasy jahandyq naryqqa shyǵýǵa daıyn. Bul úderiste Qytaıdyń óndiristik ekojúıesi taǵy da basty ról atqaryp otyr, dep habarlaıdy Sınhýa.

Negizgi ortalyq — Chjenchjoý qalasyndaǵy Foxconn zaýyty. Bul álemdegi eń iri iPhone qurastyrý bazalarynyń biri jáne Qytaıdyń elektronıka óndirisindegi aýqymynyń sımvoly sanalady.

Zaýyt qazirgi tańda tolyq qýatta jumys istep, jahandyq suranysty qanaǵattandyrý úshin jumysshylar sanyn arttyrýda. Foxconn kadr qabyldaý ortalyǵynyń aldynda kún saıyn myńdaǵan adamnan uzyn-sonar kezek paıda bolyp jatyr.

«Shildeniń sońynan beri biz kún saıyn myńdaǵan úmitkerdi qabyldap otyrmyz. Bul jaǵdaı qyrkúıektiń sońyna deıin jalǵasady dep kútilýde», — dedi Foxconn kadr bólimi basshysynyń orynbasary Fan Symın.

Zaýyt óndiristiń eń joǵary kezeńinde ondaǵan myń adamdy ýaqytsha jumysqa alady. Olar qurastyrý, sapany baqylaý jáne qaptaý jumystarymen aınalysady.

Henan provıntsııasynyń turǵyny Chjao ıAnhýeıdiń aıtýynsha, úsh aılyq jumys oǵan jáne áıeline 40 myń ıýannan astam (shamamen 5600 AQSh dollary) tabys ákelmek.

«Bul óńirdiń ortasha tabysynan áldeqaıda kóp», — dedi ol Sınhýaǵa bergen suhbatynda.

Chjenchjoý búginde iri kólik torabyna aınalǵan. Munda 8 halyqaralyq júk áýe baǵyty jumys isteıdi, olar Eýropa, Amerıka jáne Azııadaǵy 24 eldiń 100-den astam qalasyn baılanystyrady. Jańa iPhone partııalary álemge áýe, temirjol jáne avtokólik arqyly jóneltiledi.

Foxconn kesheni «qala ishindegi qala» dep atalady. Onda jumysshylarǵa arnalǵan turǵyn aımaqtar men bir mezette 12 myń adamǵa qyzmet kórsete alatyn, jasandy ıntellekt júıesi engizilgen ashanalar bar. Mundaı jaǵdaılar óndiristiń turaqtylyǵyn qamtamasyz etedi.

Aıta keteıik, Qytaı energııany tıimdi esepteýge arnalǵan JI-di tanystyrdy.