Qytaı tuzdy kólderden lıtıı óndirýge kiristi

ASTANA. KAZINFORM – Qytaı tuzdy kólderden lıtıı óndirý boıynsha álemdegi alǵashqy 20 myń tonnalyq óndiristik jelisin iske qosyp, «aq altyn» óndirýde tehnologııalyq serpiliske qol jetkizdi, dep habarlaıdy Xinhua.

Habarlanǵandaı, jobany Qytaıdyń soltústik-batysyndaǵy Tsınhaı provıntsııasynda Qinghai CITIC Guoan Technology Development Co. Ltd. kompanııasy iske asyrǵan. Óndiristik nysan jobalyq qýatyna jetti.

Birqatar ulttyq patenttermen qorǵalǵan negizgi tehnologııa ken oryndarynyń tıimdiligin aıtarlyqtaı arttyryp otyr. Tuzdy býlandyrý kezeńinde lıtııdi shyǵarý deńgeıi jalpy salalyq 50%-dan 78%-dan astamǵa deıin, al búkil óndiristik tsıkl aıasynda ónimdi shyǵarýdyń jalpy koeffıtsıenti 75,38%-dan 90,41%-ǵa deıin ósken.

Jańa ádis akkýmýlıatorlyq sapadaǵy lıtıı karbonatynyń ortasha óndiristik tsıklin aıtarlyqtaı qysqartady jáne dástúrli býlaný protsesterimen salystyrǵanda metall shyǵynyn azaıtady. Tehnologııa sonymen qatar kalıı men bor sııaqty baılanysty resýrstardy tolyq, keshendi paıdalanýdy kepildendiredi.

Bul tabys Qytaı úshin strategııalyq mańyzǵa ıe, sebebi qazirgi tańda lıtıı — elektromobılder, smartfondar, noýtbýkter jáne basqa da qurylǵylarda qoldanylatyn lıtıı-ıondy akkýmýlıatorlardy óndirýde negizgi metaldardyń biri sanalady. Sońǵy málimetterge sáıkes, Qytaıdyń rastalǵan lıtıı qory jahandyq kólemniń 16,5%-yn quraıdy. Bul kórsetkish boıynsha Qytaı álemde ekinshi orynda tur.

Mundaı ınnovatsııalar elge tuzdy kólderdegi lıtıı resýrstaryn keshendi paıdalaný deńgeıin aıtarlyqtaı arttyrýǵa jáne olardy tıimdi ıgerý merzimin uzartýǵa múmkindik beredi.

Osyǵan deıin Qytaıda lıtıı keniniń iri qory tabylǵanyn jazǵan bolatynbyz.