Qytaı, Túrkııa, Iordanııa, Arab elderi: elimizdiń argoónerkásibine qaı elder qyzyǵyp otyr

ASTANA. KAZINFORM — Aýyl sharýashylyǵy mınıstrligi sheteldik jáne transulttyq iri kompanııalardy elge tartý boıynsha da belsendi jumys istep jatyr. Onyń nátıjesi týraly Aýyl sharýashylyǵy vıtse-mınıstri Ermek Kenjehanuly aıtyp berdi. 

— Búginde túrkııalyq «Alsera» kompanııasy «Qazaqstanda jylyjaı keshenin salý» jobasy boıynsha Shymkent qalasynda qol qoıyldy. Keshen jylyna 155 myń tonna qyzanaq óndiredi, onyń quny 650 mln AQSh dollar. Sonymen qatar Arab elderiniń «QazaqArab Sugar» kompanııasymen Almaty oblysynda «Qazaqstanda qant zaýytyn salý» jobasy boıynsha kelisim jasaldy. Zaýyttyń qýattylyǵy 5 mln tonna qant qyzylshasyn óńdep, jylyna 500 myń tonna aq qant óndirýdi josparlap otyr. Jobanyń quny 580 mln AQSh dollary, — dedi Ermek Kenjehanuly ortalyq kommýnıkatsııalar qyzmeti alańynda ótken baspasóz máslıhatynda.

Odan bólek, vıtse-mınıstrdiń málimdeýinshe, bıyl 8 joba boıynsha ınvestıtsııalyq kelisimderge qol qoıý múmkindigi pysyqtalyp jatyr. Atap aıtqanda:

— Qytaılyq «Fufeng Group» jáne «Shengtai Biotech» kompanııalary Jambyl oblysynda «Júgerini tereń óńdeıtin tik ıntegratsııalanǵan ónerkásiptik park salý» jobasy, qýaty jylyna 1 mln tonna, quny 350 mln AQSh dollary;

— Amerıkalyq «PepsiCo» kompanııasy Almaty oblysynda «Tuzdy tiskebasarlar shyǵaratyn zaýyt qurylysy» jobasy, qýattylyǵy 210 myń tonna, 70 myń tonna daıyn ónim, quny 376 mln AQSh dollary;

— Majarlyq «UBM Group» kompanııasy Qaraǵandy oblysynda (jem), Almaty oblysynda (qurama jem), Almaty qalasynda (premıks) 3 qurama jem zaýyty men 1 premıks zaýytyn salý jobasy, qýattylyǵy 48 myń tonna premıks, 300 myń tonna qurama jem, jalpy quny 62 mln AQSh dollary;

— Qytaılyq «Dalian Hesheng Holdings Group» kompanııasy Aqmola oblysynda «Dándi daqyldardy tereń óńdeý zaýytyn salý» jobasy, qýattylyǵy 400 myń tonna, quny 650 mln AQSh dollary;

— Túrkııalyq «Tiryaki Holding» kompanııasy Astana qalasynda «Dándi jáne burshaqty daqyldardy tereń óńdeýge arnalǵan agroónerkásiptik keshen salý» jobasy, qýattylyǵy 240 myń tonna, burshaq óńdeý 80 myń tonn aquny 320 mln AQSh dollary;

— Dat kompanııasy «Carlsberg Group» Almaty oblysynda «Alkogolsiz sýsyndar óndirý» jobasy, qýaty 370 mln lıtr, quny 300 mln AQSh dollary;

— Polsha kompanııasy «Fabe Agro» Shymkent qalasynda «Zamanaýı jylyjaı keshenin salý» jobasy, qýaty 36 myń tonna qyzanaq pen qııar, quny 120 mln AQSh dollary;

— Iordanııalyq «AL JAZEERA AGRICULTURE COMPANY» jáne «Aıtas KZ» JShS birlesip Almaty oblysynda «Qus etin óndiretin zaýyt salý» jobasy, qýaty 35 mln jumyrtqa jáne 1000 tonna broıler eti, quny 15 mln AQSh dollary.

— Agroónerkásip kesheni salasyna ınvestıtsııa tartý jumysy memlekettik jáne jergilikti atqarýshy organdarmen birlese otyryp odan ári jalǵasyn tabady, — dep qosty mınıstrdiń orynbasary.

Aıta keteıik, bıyl tórt aıda agroónerkásip keshenine 213 mlrd teńge ınvestıtsııa tartyldy. 

Buǵan deıin bıyl el aýmaǵynda iske qosylatyn agro-jobalardy tizip shyqqan edik.