Qytaı tórt kanadalyq azamatty ólim jazasyna kesti

ASTANA. KAZINFORM – Kanada úkimeti 19 naýryz kúni Qytaıda esirtki tasymaly úshin ólim jazasyna kesilgen tórt kanadalyq azamatqa qatysty sot úkiminiń jyl basynda oryndalǵanyn málimdedi. Bul týraly Lianhe Zaobao habarlady.

Kanada syrtqy ister mınıstri Melanı Jolıdiń aıtýynsha, ólim jazasy oryndalǵan tórt adam da qos azamattyqqa ıe. Ol resmı Ottavanyń ólimge buıyrylǵan ózge kanadalyq azamattardyń jazasyn jeńildetýge kúsh salatynyn aıtty.

- Tórt kanadalyq azamatqa ólim jazasy oryndalǵanyn qatań aıyptaımyz. Olar esirtkige qatysty qylmystarmen sottalǵan, – dedi Jolı.

Kanadadaǵy Qytaı elshiligi Kanada úkimetiniń málimdemesin “jaýapkersizdik” dep jazǵyrdy. Elshilik taratqan málimdemede Qytaıdyń esirtkige qatysty qylmystarǵa árqashan qatań jaza qoldanatyny jáne bul máselede “nóldik tózimdilik” saıasatyn ustanatyny basa aıtyldy.

Sondaı-aq, Kanada Syrtqy ister mınıstrligi 2019 jyly Qytaı soty esirtki tasymaldady dep aıyptap, ólim jazasyna kesken kanadalyq Robert Shellenbergtiń úkimi áli oryndalmaǵanyn rastady.

Basylymnyń jazýynsha, Qytaı men Kanada arasyndaǵy dıplomatııalyq baılanys 2018 jyldan beri shıelenisip tur. Sol jyly Tramp ákimshiliginiń suranysy boıynsha Huawei kompanııasynyń qarjy dırektory Men Vanchjoý Vankýverde ustalǵan edi. Buǵan jaýap retinde Qytaı eki kanadalyqty tutqynǵa alǵan bolatyn. Keıin, Men Vanchjoý men kanadalyq azamattar 2021 jyly irkes-tirkes bosatyldy.

Eske salaıyq, bıyl naýryz aıynyń basynda Qytaı úkimeti Kanadadan keletin aýyl sharýashylyǵy jáne azyq-túlik ónimderine qosymsha baj salyǵyn engizgen bolatyn.