Qytaı tasqynnan zardap shekken provıntsııaǵa qosymsha 100 mln ıýan bóldi
ASTANA. KAZINFORM — Bul soma 25 maýsymda bólingen alǵashqy 100 mln ıýanǵa qosylyp, jalpy kómek kólemi 200 mln ıýanǵa jetti, dep jazady Sınhýa.
Qytaı Halyq Respýblıkasynyń Memlekettik damý jáne reformalar isteri komıteti senbi kúni Qytaıdyń ońtústik-batysyndaǵy sý tasqynynan zardap shekken Gýıchjoý provıntsııasyndaǵy tótenshe jaǵdaıdyń saldaryn joıý jáne qalpyna keltirý jumystaryna ortalyq bıýdjetten qosymsha 100 mln ıýan (shamamen 13,96 mln AQSh dollary) bólgenin habarlady.
Bólingen qarajat negizinen qatty zardap shekken Jýntszıan, Tsýntszıan jáne Sandý ýezderindegi ınfraqurylym men qoǵamdyq qyzmet nysandaryn shuǵyl qalpyna keltirýge baǵyttalady. Bul qarapaıym turǵyndardyń ómir súrýi men óndiristik qyzmettiń qalypty jaǵdaıǵa tezirek oralýyna kómektespek.
Sońǵy kúnderi toqtaýsyz jaýǵan jańbyr saldarynan Gýıchjoý provıntsııasynda kúshti sý tasqyndary boldy. Ásirese, Jýntszıan ýezinde qaıtalanǵan tasqyndarǵa baılanysty jergilikti bılik senbi kúni 12:30-dan bastap eldegi tórt deńgeıli júıe boıynsha eń joǵary deńgeıdegi shuǵyl áreket etý rejımin qaıta engizýge májbúr boldy.
Eske salsaq, seısenbi kúni saǵat 14:30–daǵy málimet boıynsha Jýntszıan jáne Tsýntszıan ýezderinde tıisinshe 48 900 jáne 32 000 adam ýaqytsha evakýatsııalandy.
Qytaı bıligi sý tasqynynan zardap shekken Gýıchjoý provıntsııasyna 100 mln ıýan bólgeni belgili boldy.
Eki kún buryn Gýıchjoý provıntsııasynda tasjol kópiri qulap, júk kóliginiń júrgizýshisi qıraǵan kópirde ilýli turǵan kólik kabınasynda qalyp qoıǵanyn habarlaǵan edik.
Sonymen qatar Qytaıdaǵy sý tasqynynan alty adam qaza tapqany belgili boldy.