Qytaı taǵy birqatar elge vızasyz rejım engizdi
ASTANA. KAZINFORM — 1 maýsymnan bastap Qytaı taǵy bes eldiń azamattaryna birjaqty vızasyz rejım engizdi, dep habarlaıdy The Paper aqparattyq portaly.
Naqtyraq aıtqanda, 2025 jylǵy 1 maýsymnan 2026 jylǵy 31 mamyrǵa deıin Brazılııa, Argentına, Chılı, Perý jáne Ýrýgvaı elderiniń jalpy azamattyq pasport ıeleri Qytaıǵa vızasyz kire alady.
Atalǵan bes eldiń azamattary Qytaıǵa iskerlik, týrızm, týysshylaý, almasý jáne tranzıt maqsatynda 30 kúnnen aspaıtyn merzimge vızasyz kele alady.
Bul — Qytaıdyń Latyn Amerıkasy men Karıb aımaǵyndaǵy elderge alǵash ret vızasyz rejım engizýi. Osylaısha, Qytaı birjaqty vızasyz rejım engizgen elderdiń qatary 43-ke jetti.
Qytaı Syrtqy ister mınıstrliginiń resmı ókili Mao Nın 28 mamyrda ótken kezekti brıfıngte 2025 jylǵy 9 maýsymnan 2026 jylǵy 8 maýsymǵa deıin Saýd Arabııasy, Oman, Kýveıt jáne Bahreın azamattaryna 30 kúndik birjaqty vızasyz rejım engiziletinin habarlaǵan bolatyn.
Qazaqstan men Qytaı ózara vızasyz rejım týraly kelisimge 2023 jyldyń 17 mamyrynda qol qoıǵan.
2024 jyly Qytaıdan kelgen týrıster sany 650 myń adamnan asyp, 2019 jylmen salystyrǵanda 9 ese ósken.