Qytaı sý tasqynynan zardap shekken aımaqtarǵa 19,6 mıllıon dollar bóldi
ASTANA. KAZINFORM – Qytaı Kommýnıstik partııasy (QKP) Qytaıdyń 9 aımaǵynda, sonyń ishinde Beıjińde sý tasqynyna qarsy jáne zardap shekkenderdi joıý jumystaryn qoldaýǵa partııa jarnalarynan 140 mıllıon ıýan (shamamen 19,6 mıllıon dollar) bóldi, dep habarlaıdy Kazinform Sınhýa agenttigine silteme jasap.
– El boıynsha aýqymdy apatty joıý jumystary jalǵasyp jatyr. Polıtsııa qyzmetkerleri 101 myń turǵyndy evakýatsııalaýǵa kómektesti. Sondaı-aq tabıǵı apattan zardap shekkken 1 800-den astam adam qutqaryldy, - dep habarlady Qytaı Halyq Respýblıkasynyń Qoǵamdyq qaýipsizdik mınıstrligi.
QHR Qoǵamdyq qaýipsizdik mınıstrligi aýmaqtyq organdarǵa zardap shekkenderge shuǵyl kómek kórsetý jáne birinshi kezekte panalaý oryndarynda, ýaqytsha ornalastyrý pýnktterinde, qoımalar men medıtsınalyq pýnktterde quqyqtyq tártipti qamtamasyz etý boıynsha jumysty bastaýdy tapsyrdy.
Qytaıdyń shyǵys, soltústik jáne soltústik-shyǵys bóliginde tolassyz jańbyr jaýyp, onyń sońy sý tasqynyna ulasty.
Beıjińde nóser jaýyn 30 adamnyń ómirin qıdy. Jańbyrdan joldardy sý basyp, elektr qýaty úzildi. Apattyń aýyrlyǵyna baılanysty barlyǵy 80 332 adam qaýipsiz jerge kóshirildi. Qytaı astanasynyń soltústik taýly aımaqtarynda adam ólimi tirkeldi.
Beıjiń qalasynyń sý tasqynyna qarsy shtaby turǵyndardy qaýipti aımaqtarǵa barýdan bas tartýǵa shaqyrdy.
Eske sala keteıik, budan buryn Qytaıdaǵy sý tasqynynyń zardaptaryn joıýǵa 2 myńnan asa áskerı jumyldyrylǵanyn jazǵan edik.
Sınhýa seriktes agenttigi Kazinform agenttigine arnaıy usynǵan.