Qytaı SІM: AQSh-tyń óktemdigine jol bere almaımyz
ASTANA. KAZINFORM – AQSh-tyń Qytaıǵa qarsy 104% kóleminde baj salyǵyn qoldanysqa engizýine baılanysty Qytaı Syrtqy ister mınıstrligi resmı Beıjińniń óz múddesin qorǵaý úshin batyl ári pármendi sharalar qoldanýdy jalǵastyratynyn málimdedi. Bul týraly Sınhýa agenttigi habarlady.
AQSh prezıdenti Donald Tramptyń «ózara tarıfter» engizý týraly sheshimi 9 sáýir kúni túste resmı túrde kúshine endi. Soǵan sáıkes Qytaıdan jetkiziletin taýarlarǵa qosymsha 104% baj salyǵy salynady.
Qytaı Syrtqy ister mınıstrliginiń resmı ókili Lın Tszıan búgingi brıfıngide Qytaı halqynyń damý jolyndaǵy zańdy quqyqtaryn tabanǵa taptaýǵa, Qytaıdyń egemendik, qaýipsizdik jáne damý múddelerine qol suǵýǵa jol berilmeıtinin atap ótti.
Lın Tszıan AQSh-tyń Qytaıǵa salynatyn baj salyǵyn óktemdikpen kóterip, shekten tys qysym jasaýǵa bel býyp otyrǵanyn synǵa aldy. Onyń aıtýynsha, mundaı óktemdik pen álimjettikke Qytaı úzildi-kesildi qarsy turady jáne jol bermeıdi.
Sondaı-aq onyń pikirinshe, AQSh saýda janjaldaryn shynymen dıalog jáne kelissóz arqyly sheshkisi kelse, teńquqylyq, ózara qurmet jáne ózara tıimdilik qaǵıdattaryn ustanýǵa tıis.
– Eger AQSh eki el men halyqaralyq qaýymdastyqtyń múddesine pysqyryp qaramaı, tarıftik qaqtyǵys pen saýda soǵysyn jalǵastyrýǵa nıet etse, Qytaı qalaıda sońyna deıin tabandylyq kórsetedi, - dedi ol.
AQSh-tyń «ózara tarıfter» saıasaty boıynsha sońǵy baj salyqtary kúshine engennen keıin, Qytaı tarapy qazirshe qarsy sharalar qoldanatynyn málimdegen joq. Degenmen, Qytaı Memlekettik keńesiniń aqparat keńsesi sársenbi kúni tústen keıin «Qytaı-AQSh saýda qatynastary týraly Qytaı tarapynyń ustanymy» atty Aq kitap jarııalady. Qujatta saýda soǵysynda esh eldiń jeńiske jetpeıtini, Qytaı men AQSh arasynda saýdaǵa baılanysty kelispeýshilik pen shıelenisterdiń bolýy qalypty qubylys ekeni atap ótilip, máseleni kelissóz arqyly laıyqty sheshý qajettigi basa aıtylǵan.
Buǵan deıin Qytaı AQSh tarıfterine baılanysty DSU kóleminde tekserý júrgizilýine bastama kótergenin jazǵan edik.