Qytaı Ortalyq Azııa elderimen birlesip ónerkásiptik kooperatsııany damytýǵa nıetti
TAShKENT. KAZINFORM — Qytaı óńir elderimen ornatylǵan baılanystardy odan ári tereńdetýge múddeli.
Bul týraly Tashkenttegi Ortalyq Azııa halyqaralyq ınstıtýtynda ótken kezdesýde Qytaıdyń Ózbekstandaǵy tótenshe jáne ókiletti elshisi ıÝı Tszıýn málim etti, dep habarlaıdy Kazinform agenttiginiń menshikti tilshisi.
Byltyr Qytaı men «Bir beldeý, bir jol» jobasyna qatysýshy elder arasyndaǵy taýar aınalym 3 trln dollardan asty. 150-den astam memleketti baılanystyratyn aýqymdy baǵdarlamanyń Ortalyq Azııa, onyń ishinde Qazaqstan úshin mańyzy zor. Resmı Astana bul jobada Azııa men Eýropany jalǵap otyrǵan tranzıttik áleýetke ıe.
— Qytaı men Qazaqstan vızasyz rejım engizý sheshimin Ortalyq Azııa elderiniń arasynda birinshi bolyp qabyldady. Bul — qos memleket arasynda ózara dostyq pen senimge negizdelgen yntymaqtasyq ornaǵanyn aıǵaqtaıdy. Biz bárimiz bir aımaqta turmyz. Bolashaq strategııamyzdy baılanystyratyn birikken jobalar kóp. Sondyqtan bizdiń Qazaqstanmen de, Ózbekstanmen de jalpy Ortalyq Azııa elderimen ornatylǵan baılanystyń jańa deńgeıge kóterilerine senimdimin, — dedi Qytaıdyń Ózbekstandaǵy elshisi ıÝı Tszıýn.
Dıplomatııalyq mıssııa basshysy atap ótkendeı, QHR Ortalyq Azııa elderimen birlesip, ónerkásiptik kooperatsııany damytýǵa nıetti.
— Biz ónerkásiptik kooperatsııany yntymaqtastyqty jańa deńgeıge shyǵaratyn baǵyt retinde sanaımyz. Atalǵan sektorda birlesken jobalardy iske asyrý mańyzdy. Ol úshin barlyq múmkindik pen negiz bar dep esepteımiz, — dedi elshi.
Ortalyq Azııa halyqaralyq ınstıtýtynyń ǵylymı qyzmetkeri Shavkat Alımbekovtiń aıtýynsha, Ortalyq Azııa elderiniń ónerkásiptik áleýeti zor. Yntymaqtastyqty tereńdete túsý bul baǵyttaǵy múmkindikti utymdy paıdalanýǵa jol ashady.
— Qytaı men Ortalyq Azııa elderiniń ónerkásiptik áleýeti zor. Búginde Ózbekstanda 3 myńnan astam kásiporyn qytaılyq kapıtalmen jumys istep tur. Sonymen qatar, QHR óńir memleketterine eń kóp ınvestıtsııa baǵyttap jatqan elderdiń kóshin bastap tur. Sondyqtan baılanystardy nyǵaıtý oryndy dep sanaımyz, — dedi Shavkat Alımbekov Kazinform tilshisiniń saýalyna jaýap bere otyryp.
Jıynǵa qatysýshylar bıyl Qazaqstanda ótetin «Ortalyq Azııa — Qytaı» sammıtiniń mańyzyna da toqtaldy. Sarapshylardyń pikirinshe, memleket basshylarynyń túrli formattaǵy kezdesýleri elder arasyndaǵy baılanystardy nyǵaıtýǵa erekshe serpin beredi.
— Qazir álemde kórshi elder bir-birimen tyǵyz baılanys ornatýǵa múddeli. Óıtkeni, qarym-qatynas bolmaı, eshqandaı ekonomıka alǵa jyljymaıdy. Máselen, qazir Qytaı men Ózbekstan arasynda taýar aınalym 13 mlrd dollarǵa jetti. Al eger Qytaıda qandaı da bir másele týyndasa, onda ol bizdiń ekonomıkaǵa sózsiz áser etedi, — dep pikir bildirdi Ortalyq Azııa halyqaralyq ınstıtýtynyń bas ǵylymı qyzmetkeri Nosırjon ıÝsýpov.
Eske salaıyq, Ózbekstan men Qytaı arasynda 30 kúndik vızasyz rejım engiziledi.
Buǵan deıin habarlaǵanymyzdaı, Qazaqstan men Ózbekstan arasyndaǵy óńiraralyq baılanys nyǵaıyp keledi.