Qytaı onlaın-saýda men tikeleı efırdegi kommertsııany qatań retteıdi
ASTANA. KAZINFORM — Sársenbi kúni Qytaı bıligi eldegi tikeleı efırdegi elektrondyq kommertsııa men onlaın-saýda platformalaryn odan ári retteýge arnalǵan eki jeke qujat jarııalady, dep habarlaıdy Sınhýa.
Birinshi qujat Qytaıdyń Memlekettik naryqty retteý basqarmasy men Internet aqparatyn retteý memlekettik keńsesi birlesip shyǵarǵan, onda onlaın-translıatsııalar men marketologtar úshin mindetter men minez-qulyq shekteýleri kórsetilgen.
Jańa erejelerge sáıkes, strımıngtik platformalardaǵy tikeleı efır zaldary men marketologterge jalǵan jarnama jasaý, kommertsııalyq qaralaý júrgizý, zańsyz ónimder men qyzmetterdi satý tyıym salynady.
Ekinshi normatıvtik akt onlaın-saýda platformalaryna arnalǵan. Onda onlaın-saýdany tártippen júrgizý jáne barlyq taraptyń zańdy quqyqtary men múddelerin qorǵaý mindeti kórsetilgen.
Jańa erejelerge sáıkes, platformalar óz erejelerin saýdagerlerge negizsiz shekteý qoıý nemese aqylǵa qonymsyz tólemder talap etý úshin paıdalana almaıdy. Sondaı-aq tutynýshylardyń quqyqtaryn shektemeýi, derekterge negizdelgen baǵa aıyrmashylyǵyn qoldanbaýy jáne múshelik sharttaryn birjaqty ózgertpeýi tıis.
Qujattardyń tıimdi iske asyrylýyn qamtamasyz etý úshin eki vedomstvo aqparat almasý jáne birlesken keńester arqyly ózara yntymaqtastyqty kúsheıtedi. Onlaın-platformalarǵa ózdiginen baǵalaý júrgizip, erejelerdi saqtaý týraly esepterin turaqty túrde jarııalaý usynylady.
Buǵan deıin habarlanǵandaı, Qytaıda jerleý qyzmetin retteý erejesine ózgerister engizildi.