Qytaı óneri men mádenıetine erekshe nazar aýdaryldy - mınıstrlik
ASTANA. KAZINFORM – Alǵashqy jartyjyldyq Qazaqstannyń mýzeı salasy úshin erekshe belsendi kezeń boldy. Elimizdegi mýzeıler osy ýaqyt aralyǵynda 800-den astam túrli formattaǵy is-shara ótkizip, halyqaralyq mádenı keńistikpen yqpaldastyqty nyǵaıtty, dep habarlaıdy Mádenıet jáne aqparat mınıstrligi.
Qazirgi tańda Qazaqstanda 270-ten astam mýzeı jumys isteıdi. Olar tarıhı-mádenı murany saqtaý jáne jurtshylyqqa nasıhattaý mindetin atqarady. 2025 jyldyń alǵashqy alty aıynda mýzeılerde 817 is-shara uıymdastyryldy. Onyń ishinde:
- 28 halyqaralyq joba,
- 154 respýblıkalyq deńgeıdegi is-shara,
- 45 bilim berý semınary qamtyldy.
Mýzeıler kásibı biliktilikti arttyrý, jańa aýdıtorııany tartý, mádenı bilim men zertteý ortalyǵy retinde túrli konferentsııalar, dóńgelek ústelder, sheberlik sabaqtary men dárister ótkizetin alańǵa aınalyp otyr.
Saladaǵy mańyzdy jańalyqtardyń biri – QR Ábilhan Qasteev atyndaǵy Memlekettik óner mýzeıi men QR Ortalyq memlekettik mýzeıine «Ulttyq mýzeı» mártebesiniń berilýi boldy.
Buǵan qosa, Astanada ótken Qazaqstan mýzeıleriniń ІІІ Kongresi mádenı murany saqtaý, qalpyna keltirý jáne tsıfrlandyrý máselelerine arnalǵan kásibı pikirtalas alańyna aınaldy.
Qazaqstandyq mýzeıler halyqaralyq bastamalarǵa belsendi qatysyp keledi. Máselen:
- Á.Qasteev mýzeıinde «Turan taýlary» atty halyqaralyq kórme-sımpozıým ótti;
- QR Ulttyq mýzeıi «Ulttyq qundylyqtar: salttyń syrly beınesi» atty respýblıkalyq baıqaý uıymdastyrdy;
- «Qazaqstan – Reseı» halyqaralyq dóńgelek ústeli gýmanıtarlyq baılanysty nyǵaıtty;
- TÚRKSOI uıymymen birlesip Almatyda «Uly Dalanyń ulttyq dástúrleri» atty ІІІ halyqaralyq ǵylymı forým ótkizildi.
2025 jyly Qytaı óneri men mádenıetine erekshe nazar aýdaryldy. QR Ulttyq mýzeıinde «Qytaı óneriniń oı-maqsattary» atty kórme jáne «Jibek jáne Jibek joly: Qytaıdan Qazaqstanǵa» jobasy ótti.
Mádenıet salasyndaǵy taǵy bir mańyzdy oqıǵa – Beıjiń qalasyndaǵy Qazaqstannyń Mádenıet ortalyǵynyń ashylýy. Prezıdent Qasym-Jomart Toqaevtyń Qytaıǵa sapary aıasynda júzege asqan bul joba – elimizdiń sheteldegi alǵashqy resmı mádenı ókildigi.
Jańa ortalyqta kitaphana, kórme jáne konferents-zaldar, sondaı-aq shyǵarmashylyq jáne til úırený úıirmeleri qarastyrylǵan. Munda Qytaı aýdıtorııasyna arnalǵan kórmeler, kontsertter, festıvalder men dárister uıymdastyrý josparlanýda.
Sondaı-aq, QR Mádenıet jáne aqparat mınıstrligi Astanada Qytaıdyń Mádenıet ortalyǵyn ashý máselesin de qarastyryp jatyr.
2025 jyldyń alǵashqy jartyjyldyǵy Qazaqstan mádenıetiniń ishki jáne halyqaralyq deńgeıde qarqyndy damyp kele jatqanyn kórsetti. Mýzeı salasyndaǵy bastamalar mádenı dıplomatııany nyǵaıtyp, eldiń halyqaralyq bedelin arttyrýǵa úles qosýda.
Aıta keteıik, Almatyda Ortalyq mýzeıge kirý quny ózgerdi.