Qytaı Norvegııa úshin vızasyz rejım engizedi

ASTANA. KAZINFORM – Qytaı bıligi Norvegııaǵa vızasyz rejım engizbek. Bul týraly Norvegııa úkimetiniń saıtynda aıtylǵan.

Beıjińdegi Qytaı-Norvegııa kelissózderinde Qytaı tóraǵasy Sı Tszınpın norvegııalyqtarǵa Qytaıǵa 15 kúnge deıin kirý úshin endi vıza alýdyń qajeti bolmaıtynyn málimdedi.

«Bul norvegııalyq bıznes, stýdentter jáne basqa tulǵalardyń Qytaıǵa barýyn aıtarlyqtaı jeńildetedi. Bul sondaı-aq odan ári yntymaqtastyqtyń negizin qalaıdy», - dep keltirdi úkimet saıty Norvegııanyń premer-mınıstri Ionas Gar Stereniń sózin.

Eske sala ketsek, bıyl naýryz aıynan bastap Qytaı Shveıtsarııa, Irlandııa, Vengrııa, Aýstrııa, Belgııa jáne Lıýksembýrgke vızasyz rejımdi synaqtan ótkizgen bolatyn. Buǵan deıin Qytaı bıligi 2023 jyldyń jeltoqsan aıynan bastap EO-ǵa múshe bes memleket: Ispanııa, Italııa, Nıderland, Frantsııa jáne Germanııa azamattary úshin birjaqty vızasyz rejım engizgen bolatyn.

Buǵan deıin Qytaı sheteldikterge Gonkong pen Makao arqyly týrıstik toptardyń quramynda Haınan provıntsııasyna 144 saǵattyq vızasyz rejımmen kirýge ruqsat bergeni týraly habarlaǵan bolatynbyz. 

Sondaı-aq Qytaıdyń alǵashqy elektrondy vızasy Shanhaıda shyǵarylǵan.