Qytaı men AQSh port alymdaryn bir jylǵa toqtatty

ASTANA.KAZINFORM — Qytaı men AQSh bıligi osy jyldyń basynda engizilgen port alymdaryn bir jylǵa toqtatty, dep habarlaıdy QHR Saýda mınıstrligi.

AQSh Saýda ókiliniń keńsesi 10 qarashadan bastap Qytaıdyń keme jasaý jáne onymen baılanysty salalaryna qatysty Saýda týraly zańnyń 301-baby boıynsha tergeýdi 12 aıǵa toqtatatynyn habarlady.

Qytaı Saýda mınıstrliginiń málimetinshe, bul sheshimge qytaılyq kemeler úshin port alymdarynan ýaqytsha bosatý, sondaı-aq qytaılyq jaǵalaý krandary men basqa da jabdyqtarǵa qosymsha tarıfterdi toqtata turý kiredi.

— Eki tarap Kýala-Lýmpýrdaǵy saýda-ekonomıkalyq konsýltatsııalarda qol jetkizilgen konsensýsty birlesip júzege asyrý úshin bir-birine qaraı mańyzdy qadam jasady, — dedi mınıstrlik ókili.

Qytaı sonymen qatar óziniń jaýap sharalaryn bir jylǵa toqtatty jáne ózara qurmet pen teń konsýltatsııalarǵa negizdelgen Amerıka Qurama Shtattarymen dıalogty jalǵastyrýǵa daıyn ekenin bildirdi.

Biz buǵan deıin Qytaıdyń AQSh kemeleri úshin arnaıy port alymyn engizetinin habarlaǵan bolatynbyz.