Qytaı men AQSh arasyndaǵy saýdaǵa salynǵan qosymsha baj salyǵynyń merzimi uzardy

ASTANA. KAZINFORM — Qytaı AQSh-tan ımporttalatyn taýarlarǵa salynatyn 24%-dyq qosymsha baj salyǵyn taǵy bir jylǵa toqtatady jáne stavkany 10% deńgeıinde saqtaıdy, dep jazdy Kazinform agenttiginiń menshikti tilshisi Sınhýa agenttigine silteme jasap. 

Qytaıdyń Memlekettik Keńes janyndaǵy Keden bajdary komıtetiniń habarlaýynsha, bul sheshim 2025 jylǵy 10 qarasha, saǵat 13:01-de kúshine enedi.

Komıtet bul qadamdy Qytaı men AQSh arasyndaǵy saýda-ekonomıkalyq kelissózder aıasynda qol jetkizilgen kelisimderdi oryndaý úshin jasalǵanyn atap ótti.

— Qosymsha baj salyǵynyń bir bóligin toqtatý ekijaqty saýda-ekonomıkalyq qatynastardyń deni saý, turaqty jáne uzaq merzimdi damýyna yqpal etedi, eki el halqy úshin paıda ákeledi jáne jahandyq órkendeýge úles qosady, — dep habarlady komıtet.

Sonymen qatar, kórsetilgen kúnnen bastap Qytaı naýryz aıynda AQSh-tan alynatyn keıbir taýarlarǵa engizgen qosymsha baj salyǵyn da toqtatady. Naýryzdaǵy habarlamaǵa sáıkes, 15% baj salyǵy taýyq eti, bıdaı, júgeri jáne maqta ımporttaryna, al 10% — sorgo, soıa, shoshqa eti, sıyr eti, teńiz ónimderi, jemister, kókónister jáne sút ónimderine qoldanylǵan.

Komıtet atap ótkendeı, qosymsha baj salyǵynyń bir bóligin alyp tastaý Qytaı men AQSh-tyń negizgi múddelerine saı keledi, halyqaralyq qoǵamdastyq kútken úmitterdi qanaǵattandyrady jáne ekijaqty ekonomıkalyq qatynastardy jańa deńgeıge kóterýge múmkindik beredi.

Esterińizge sala keteıik, buǵan deıin Kýala-Lampýrda Qytaı men AQSh qandaı kelisim jasaǵanyn jazǵan bolatynbyz.