Qytaı MAGATE-ni «Fýkýsıma» AES-nen aǵatyn sýdy baqylaýǵa shaqyrdy

Qytaı MAGATE-ni «Fýkýsıma» atom elektr stantsııasynan muhıtqa aǵyzylatyn lastanǵan sýdy ádil baqylaýǵa alýǵa shaqyrdy, dep habarlaıdy QazAqparat.

Qytaı Syrtqy ister mınıstriniń orynbasary Ma Chjaosıýı 21 qyrkúıekte Nıý-Iorktegi MAGATE bas dırektory Rafael Grossımen kezdesýinde Beıjińniń ustanymyn baıandady.

Qytaı ókili álemdik qaýymdastyqtyń, sonyń ishinde Qytaıdyń alańdaýshylyǵyna jaýap retinde naqty qadamdar jasalý kerektigin aıtty. Ma Chjaosıýı Japonııanyń áreketin synap, Tokıonyń kórshi elder men óz halqynyń narazylyqtaryn elemeı, sýdy aǵyzý josparyn ilgeriletip jatqanyn atap ótti.

Rafael Grossı óz kezeginde Qytaıdyń alańdaýshylyǵyn jáne ustanymyn qurmetteıtinin aıtty. Onyń aıtýynsha, MAGATE bul máselede obektıvti jáne beıtarap ustanymyn saqtaıdy. Ol Beıjińmen tyǵyz dıalog saqtalatynyna sendirdi.

Qytaı bıligi «Fýkýsıma» AES sýyn aǵyzý japon bıligi josparynyń qaýipsizdigin rastaıtyn ǵylymı dálelderge negizdelmegen dep sanaıdy.

Buǵan deıin Japonııanyń «Fýkýsıma-1» Atom-elektr stantsııasyndaǵy apattan 12 jyl ótkennen keıin Tokıo bıligi ıadrolyq reaktorlardy sýytý úshin paıdalanylǵan radıoaktıvti sýdy Tynyq muhıtyna tóge bastaǵanyn habarlaǵan bolatynbyz.