Qytaı qus sııaqty ushatyn ınnovatsııalyq robotty jasady

ASTANA. KAZINFORM — Bıotehnologııalyq robototehnıka salasyndaǵy serpindi jetistik aıasynda qytaılyq mamandar komandasy qus sııaqty ózdiginen ushýǵa qabiletti robotty jasap shyǵardy, dep habarlaıdy Sınhýa.

RoboFalcon2.0 dep atalǵan jańa robot qustar men jarqanattardyń qanat qımyldaryn ımıtatsııalaıdy jáne basqarylatyn ushýdy qaıta baptaýǵa bolatyn jańa mehanızmniń kómegimen iske asyrady.

Science Advances jýrnalynda jarııalanǵan zertteýde robottyń ushatyn omyrtqalylardyń baıaý qalyqtaýy kezinde baıqalatyn FSF / «jaıylý-qaǵý-jıylý» qozǵalysyn qalaı qaıtalaıtyny egjeı-tegjeıli sıpattalǵan.

Ushatyn omyrtqalylar ádette qalqyp turý, bıiktikke kóterilý jáne qoný kezinde qanattyń kúrdeli qımyl kınematıkasyn qoldanady, bul jándikterdiń ushý mehanızmderinen ózgeshe. Tómen jyldamdyqpen ushqan kezde ushatyn omyrtqalylar (mysaly, qustar) ushý tıimdiligin arttyrý úshin qanattaryn tómen qaraı kúshpen qaǵyp, al joǵary qaraı baıaý jáne az áser etetin qozǵalyspen qaıtarady.

Soltústik-Batys polıtehnıkalyq ýnıversıtetiniń mamandary omyrtqalylardyń baıaý ushý kınematıkasyn qaıtalap, bir tsıkl ishinde «jaıylý-qaǵý-jıylý» qozǵalysyn biriktiretin konıkalyq aınalmaly mehanızm jasap shyǵardy.

Zertteý nátıjesine qaraǵanda, shynaıy jaǵdaıda júrgizilgen synaqtar RoboFalcon2.0 robotynyń ózdiginen usha alatynyn kórsetti.

Bul ınnovatsııalyq jetistik qustarǵa tán basqarý tásilderine negizdelgen, usha alatyn ári manevr jasaý qabileti joǵary kólik quraldaryn jasaýǵa túrtki bolýy múmkin. Mundaı tásil qanatyn qaǵyp ushatyn robottardyń tabıǵatqa uqsas (bıomımetıkalyq) dızaınyn damytýǵa jol ashady.

Budan buryn habarlanǵandaı, gýmanoıd robottar bolashaqta adamdardy almastyrady. Sebebi Figure AI kompanııasy kıim-keshekti búkteý jáne azyq-túlikti jınaý sııaqty qarapaıym tapsyrmalardy oryndaýǵa qabiletti gýmanoıd robottardy jasap shyǵardy.