Qytaı kıberqaýipsizdik týraly zańyn jańartty
ASTANA.KAZINFORM - Qytaı kıberqaýipsizdik týraly zańynda JI salasyn retteıtin zańnamalyq bazany nyǵaıtýǵa baǵyttalǵan túzetýlerdi maquldady. Sheshim seısenbi kúni Búkilqytaılyq halyq ókilderi jınalysynyń 18-shi otyrysynda qabyldandy, dep habarlaıdy Sınhýa.
Jańartylǵan zań jasandy ıntellekt tehnologııalarynyń qaýipsiz jáne turaqty damýy úshin jaǵdaı jasaýǵa baǵyttalǵan. Qujatta jasandy ıntellekt salasyndaǵy irgeli zertteýlerdi qoldaý, algorıtmderdi qosa alǵanda, negizgi tehnologııalardy ázirleý jáne zamanaýı ınfraqurylymdy, derekqorlar men esepteý júıesin qurý kózdelgen.
Etıka men qaýipsizdikke erekshe nazar aýdarylady. Zań jasandy ıntellektti jaýapkershilikpen paıdalaný standarttaryn jetildirý, táýekelderdi baqylaý jáne baǵalaý, sondaı-aq qaýipsizdikti qadaǵalaýdy kúsheıtý talaptaryn belgileıdi.
Reformanyń taǵy bir mańyzdy baǵyty kıberqaýipsizdik salasyndaǵy zańdy jaýapkershilikti kúsheıtý jáne erejelerdi basqa da qoldanystaǵy Qytaı zańdarymen úılestirý bolady. Túzetýler 2026 jyldyń 1 qańtarynan bastap kúshine enedi.
Aıta keteıik, osy saladaǵy negizgi normatıvtik akt sanalatyn Qytaı Halyq Respýblıkasynyń qoldanystaǵy Kıberqaýipsizdik týraly zańy 2016 jyly qabyldanǵan.
Buǵan deıin Qytaıda jelden qýat alatyn alǵashqy sýasty derekter ortalyǵy iske qosylǵany habarlanǵan bolatyn.