Qytaı ǵalymdary ushaq pen avtokólikti biriktirdi

ASTANA. KAZINFORM – Qytaıdyń aeroǵarysh salasyndaǵy ǵylymı mekemeleri ushaq pen avtokóliktiń qasıetterin biriktiretin ınnovatsııalyq elektrli áýe kóligin jasap shyǵardy, dep habarlaıdy Xinhua.

Qytaı aeroǵaryshtyq ǵylymı-tehnıkalyq korporatsııasynyń CASC quramyndaǵy Toǵyzynshy akademııa Chýntsın qalasynda tik ushyp-qoný múmkindigi bar elektrli ushaqtyń (eVTOL) synaq ushýlaryn sátti ótkizdi.

Ázirleýshilerdiń málimetinshe, jańa apparat ushaq pen avtokóliktiń fýnktsıonaldyq múmkindikterin biriktiretin gıbrıdti platforma bolyp sanalady. Mundaı konfıgýratsııa júıege jerústi jáne áýe rejımderi arasynda kedergisiz aýysýǵa múmkindik beredi. Bul sheshim kólik mindetterine jáne qalalyq ınfraqurylym jaǵdaılaryna beıimdelýge jol ashady.

eVTOL apparaty qanattardan, kabınadan jáne shassıden turady. Áýe modýli eki jolaýshyny 3000 metr bıiktikke deıin tasymaldaı alady jáne saǵatyna 150 shaqyrymǵa deıin jyldamdyqqa jetedi.

Al tolyqtaı elektrli ıntellektýaldy shassımen jabdyqtalǵan jerústi modýliniń júris qory 300 shaqyrymnan asady.

Injenerlerdiń aıtýynsha, platformanyń kópfýnktsıonaldy sıpaty ony kólik, logıstıka jáne tótenshe jaǵdaılarǵa jedel áreket etý salalarynda keńinen qoldanýǵa múmkindik beredi. Bul sheshim Qytaıda belsendi damyp kele jatqan tómen bıiktiktegi ekonomıka tujyrymdamasymen tyǵyz baılanysty.

Buǵan deıin Qytaı álemde alǵash ret gıbrıdti qozǵaltqyshy bar aýyr júk tasymaldaıtyn ushqyshsyz apparatty synaqtan ótkizgeni habarlanǵan.