Qytaı ǵalymdary qyryqqulaqtan sırek kezdesetin elementterdi tapty

ASTANA. KAZINFORM — Qytaılyq ǵalymdar qyryqqulaqtyń sırek kezdesetin elementterdi jınaı alatynyn anyqtady. Bul týraly Sınhýa agenttigi Environmental Science & Technology jýrnalyna silteme jasap habarlady.

Sırek kezdesetin metaldar taza energııa salasy úshin mańyzdy jáne joǵary tehnologııalyq ónerkásipte qoldanylýy múmkin. Alaıda olardyń óndirisi men jetkizilýi ekologııalyq jáne geosaıası máselelerge baılanysty qıyndyqtar týǵyzady.

Buryn belgili bolǵandaı, keıbir mıkrobtar men janýarlar óz aǵzasynda mıneraldar jasaı alady. Al ósimdikterdiń bıomıneralızatsııasy uzaq ýaqyt boıy jetkilikti baǵalanbaǵan edi.

Qytaı ǵylym akademııasynyń Gýanchjoý geohımııa ınstıtýtynyń zertteýshileri Blechnum orientale qyryqqulaǵyn zerttep, onyń tinderinen sırek kezdesetin elementter tapqan. Ǵalymdar ósimdiktiń olardy topyraqtan sińiretinin jáne nanobólshekter túrinde tundyratynyn anyqtady. Keıin olar monatsıt-(La) mıneraly retinde krıstaldanady.

Tabıǵı monatsıt, geologııalyq protsesterdiń nátıjesinde túziletin, kóbine radıoaktıvti elementterdi qamtıdy. Al paporotnık arqyly túziletin «bıologııalyq monatsıt» taza jáne radıoaktıvsiz bolyp keledi.

Bul ǵylymı jańalyq sırek kezdesetin mıneraldardyń shyǵý tegin túsinýdi ózgertedi jáne ósimdikter-gıperakkýmýlıatorlar kómegimen metaldardy topyraqtan ekologııalyq jolmen shyǵarý – fıtotazartý ádisiniń múmkindigin negizdeıdi.

Aıta keteıik, Qytaı Ortalyq Azııa ósimdikteri týraly kóptildi derekter bazasyn qurýdy qolǵa aldy.