Qytaı chıpke salynǵan sanktsııalarǵa jaýap retinde AQSh-qa gallıı, germanıı jáne sýrma eksporttaýǵa tyıym saldy

ASTANA.KAZINFORM — Qytaı chıpterge qoıylǵan shekteýge baılanysty AQSh-qa gallıı, germanıı, sýrma jáne basqa da paıdaly qazbalar eksporttaýǵa tyıym salatynyn málimdedi, dep jazady The Hill.

Qytaıdyń Saýda mınıstrligi bul qadamǵa Vashıngton eksporttyq baqylaýǵa jatatyn qytaılyq kompanııalar tizimin kompıýterlik chıpter shyǵaratyn jabdyqty, baǵdarlamalyq qamtamasyz etý jáne ótkizý qabilettiligi joǵary jad mıkroshemalaryn keńeıtkennen keıin bardy.

Saýda shekteýleriniń kúsheıýi jańadan saılanǵan prezıdent Donald Tramptyń Qytaıdan jáne basqa elderden ımporttalatyn taýarlarǵa baj salyǵyn kúrt kóterýmen qorqytýymen baılanysty, bul óz kezeginde saýda men tehnologııalyq shıelenisti kúsheıtýi múmkin.

— Qytaı jartylaı ótkizgishterdi eksporttaýdy baqylaýdy jańartýǵa, qytaılyq kompanııalarǵa qarsy sanktsııalarǵa jáne Qytaıdyń tehnologııalyq progresiniń qasaqana jolyn kesýge baılanysty AQSh-qa qatań narazylyq bildirdi, — dedi Qytaı Syrtqy ister mınıstrliginiń resmı ókili Lın Tszıan.

2023 jyldyń shildesinde Qytaı eksporttaýshylardan gallıı men germanıı sııaqty strategııalyq materıaldardy AQSh-qa jóneltýge lıtsenzııa alýdy talap etetinin aıtty. Tamyz aıynda Qytaıdyń Saýda mınıstrligi akkýmýlıatordan qarý-jaraqqa deıingi ónimderdiń keń aýqymynda qoldanylatyn sýrmany eksporttaýdy shekteıtinin jáne grafıt eksportyna qatań baqylaý ornatatynyn málimdedi.

Mundaı paıdaly qazbalar ulttyq qaýipsizdik úshin mańyzdy. Qytaı — jalynǵa qarsy zattarda, batareıalarda, túnde kóretin kózildirikterde jáne ıadrolyq qarýda qoldanylatyn sýrmanyń negizgi óndirýshisi.

Beıjiń seısenbide jarııalaǵan shekteýlerge gaýhar tastar jáne basqa tyǵyz sıntetıkalyq materıaldar sııaqty óte qatty materıaldar eksporty da kiredi. Olar keskish quraldar, dıskili tejegishter jáne qorǵanys jabyndary sııaqty kóptegen ónerkásipte qoldanylady.