Qytaı Bilim mınıstri ShYU elderinde bilim salasyn damytý boıynsha úsh usynys aıtty
ASTANA. KAZINFORM — Qytaı ShYU-ǵa múshe eldermen zamanaýı tehnologııaǵa negizdelgen ekojúıeni qurý úshin jasandy ıntellekt pen tsıfrlyq bilim berýdi birlesip damytýǵa daıyn.
Bul týraly búgin Astanada ótken «Joǵary bilim berý jáne óndiristi ıntegratsııalaý salasyndaǵy yntymaqtastyq» atty halyqaralyq sımpozıýmda QHR Bilim mınıstri Hýaı Tszınpen málim etti.
«Qytaı-Qazaqstan dostyǵynyń uzaq tarıhy bar. Eki el arasyndaǵy dıplomatııalyq qarym-qatynastyń ornaǵanyna 2 myń jyldan asty, ásirese sońǵy ýaqytta úlken jetistikterge jettik. Keshe Qazaqstannyń Ǵylym jáne joǵary bilim mınıstri Saıasat Nurbek ekeýmiz eki eldiń memleket basshylarynyń qatysýymen bilim salasyndaǵy kelisimderge qol qoıdyq. Osylaısha jańa tarıhı kezeń, ıaǵnı „Qytaı-Qazaqstan“ qarym-qatynasynyń 30-shy jyldyǵyna birlesken mańyzdy qadam jasadyq. Keshe QHR Tóraǵasy Sı Tszınpın óz sózinde Qazaqstanǵa qyzmet babymen 5 ret kelgenin, sońǵy sapary nebári 10 aı buryn ǵana bolǵanyn atap ótti. Eki el kóshbasshysy qabyldaǵan sheshimder bizdi jańa jolǵa baǵyttaıtynyna senimdimin», — dep bastady alǵy sózin Hýaı Tszınpen sımpozıýmda.
Sondaı-aq, meıman QHR Bilim mınıstrliginiń tsıfrlyq bilim berýdiń dúnıejúzilik kongresi, kásiptik-tehnıkalyq bilim berýdi damytý máselesi jónindegi dúnıejúzilik konferentsııa, ınnovatsııa men kreatıv boıynsha stýdentterge arnalǵan halyqaralyq ınnovatsııalyq konkýrs sııaqty mańyzdy úrdisterde bastamashy vedomstvo ekenin málimdedi.
«Qazir biz Shanhaıda jahandyq aýqymda bilim berý júıesiniń sapaly damýyna úles qosý úshin UNESCO janyndaǵy STEM bilim berýdi zertteý ýnıversıtetiniń ashylýyna daıyndalyp jatyrmyz», — deıdi ol.
Odan bólek, mınıstr Qytaı tarapynyń ShYU-ǵa múshe eldermen odan ári jumys isteýge daıyn ekenin jetkizip, bilim salasyn damytý boıynsha 3 usynys aıtty.
«Birinshi mindet — bilim berý yntymaqtastyǵynyń jańa joldaryn izdeý. Qytaı tarapy aldaǵy úsh jylda halyqaralyq qytaı tili muǵalimderine 1 myń grant, sondaı-aq qytaı tili baıqaýynyń jazǵy lagerlerine 3 myń kvota berýge daıyn. Ekinshi mindet — ShYU-nyń master-klass baǵdarlamasy esebinen ShYU granttarynyń aýqymyn keńeıtý jáne qalyptastyrý. Sondaı-aq, bıznespen jáne óndirispen birlesip ShYU-ǵa múshe elder úshin ınnovatsııalyq mamandar daıarlaýǵa qosarlanǵan ǵylymı jetekshiler júıesin damytýǵa daıynbyz. Úshinshi mindet — ShYU tsıfrlyq bilim arhıtektýrasyn birlesip ashýdy usynamyn», — dedi QHR Bilim mınıstri Hýaı Tszınpen.
Buǵan deıin habarlaǵanymyzdaı, elimizdegi ulttyq ýnıversıtetterde qytaı tilin oqytatyn kafedralar qurylady.
Al Astanadaǵy Eýrazııa ulttyq ýnıversıtetinde Lý Ban sheberhanasy ashylady.
Búgin elordadaǵy Astana IT ýnıversıtetinde «Joǵary bilim berý jáne óndiristi ıntegratsııalaý salasyndaǵy yntymaqtastyq» degen ataýmen halyqaralyq sımpozıým ótti.
Oǵan QHR Bilim mınıstri Hýaı Tszınpen, QR Ǵylym jáne joǵary bilim mınıstri Saıasat Nurbek, Jibek joly ýnıversıtetteri alıansynyń hatshylyǵy, ál-Farabı atyndaǵy Qazaq ulttyq ýnıversıtetiniń basqarma tóraǵasy — rektory Janseıit Túımebaev, Sıan Tszıaotýn ýnıversıtetiniń rektory Chjan Lıtsıýn, Astana IT ýnıversıtetiniń rektorynyń mindetin atqarýshy Serik Ómirbaev jáne 20 joǵary oqý ornynyń rektory qatysty.
