Qytaı bıiligi sırek kezdesetin metaldar eksportyna qajet lıtsenzııany qaraý merzimin jedeldetedi

ASTANA. KAZINFORM - Qytaı jahandyq óndiris, jetkizý tizbeginiń turaqtylyǵy men qaýipsizdigin saqtaýǵa úlken mán beredi. Bul týraly Qytaı Saýda mınıstrliginiń baspasóz hatshysy He ıAdýn málim etti, dep jazady Kazinform.

— Qytaı sırek kezdesetin metaldardy eksporttaý lıtsenzııasyna ótinim qaraýdy jedeldetip jatyr — dedi ol.

Onyń aıtýynsha, Qytaı belgili bir ótinimderdi maquldady jáne bul protsesti jalǵastyrady. Qytaı tarapy eksporttyq baqylaý máseleleri boıynsha tıisti eldermen dıalogty nyǵaıtýǵa daıyn.

Aıta keteıik, Qytaı 2025 jyldyń sáýir aıynda «ulttyq qaýipsizdikti qamtamasyz etý jáne ıadrolyq qarýdy taratpaýdy qosa alǵanda, halyqaralyq mindettemelerin oryndaý» maqsatynda 7 sırek jer metalynyń (samarıı, terbıı, skandıı, ıttrıı jáne t.b.) eksportyna shekteý qoıǵan bolatyn.

Qytaı joǵary tehnologııalyq qurylǵylardy óndirýde keńinen qoldanylatyn sırek kezdesetin metaldardy álemdegi eń iri jetkizýshilerdiń biri.

Buqaralyq aqparat quraldarynyń habarlaýynsha, 2022 jyly Qytaıdyń úlesine álemdegi sırek kezdesetin metall óndirisiniń 63%, sırek metaldardy óńdeýdiń 85% jáne sırek jer magnıti óndirisiniń 92% tıesili.

Osyǵan deıin Qytaıdyń sırek metall eksportyna qoıylǵan shekteýdi jeńildetýi múmkin ekeni týraly jazdyq.