Qytaı benzın men dızeldiń bólshek baǵasyn baqylaýdy jalǵastyrady

ASTANA. KAZINFORM — Qytaı álemdik munaı baǵasynyń ósýiniń ishki naryqqa áserin jumsartý úshin sársenbiden bastap benzın men dızel otynynyń bólshek baǵasyna baqylaý sharalaryn jalǵastyrady, dep jazady Sınhýa.

Bul týraly seısenbi kúni QHR Memlekettik damý jáne reformalar komıteti habarlady.

Vedomstvonyń málimetinshe, naýryz aıynyń sońynda ishki munaı baǵasy túzetilgennen keıin álemdik shıki munaı baǵasy aıtarlyqtaı qubylǵan.

Qoldanystaǵy baǵa belgileý tetigine sáıkes, benzın baǵasy tonnasyna 800 ıýanǵa (shamamen 116 AQSh dollary), al dızel 770 ıýanǵa qymbattaýy tıis edi. Alaıda engizilgen baqylaý sharalarynyń arqasynda bul ósim sársenbiden bastap tıisinshe 420 jáne 400 ıýanmen shekteledi.

Qytaıdyń úsh iri munaı kompanııasyna — China National Petroleum Corporation, China Petrochemical Corporation jáne China National Offshore Oil Corporation, sondaı-aq basqa da munaı óńdeý kásiporyndaryna óndiris pen tasymaldy tıimdi uıymdastyryp, munaı ónimderiniń turaqty jetkizilýin qamtamasyz etý tapsyryldy.

Sonymen qatar, quzyrly organdarǵa naryqty baqylaýdy kúsheıtip, tekserister júrgizý, sondaı-aq baǵa saıasatyn buzý sııaqty zańbuzýshylyqtardy qatań túrde anyqtap, jazalaý mindeti júkteldi.

Buǵan deıin Irandaǵy bitimgershilik týraly habarlamalardan keıin munaı baǵasy kúrt tómendegeni belgili boldy.