Qytaı balabaqsha tólemderiniń biryńǵaı erejelerin engizedi
ASTANA. KAZINFORM — Qytaı bıligi balabaqsha tólemaqysyn óndirip alýdyń jańartylǵan erejelerin bekitti, olar 2026 jyldyń 1 qańtarynan bastap kúshine enedi. Jańa saıasat otbasylarǵa túsetin qarjylyq aýyrtpalyqty azaıtýǵa, tólem júıesin ashyq etýge jáne memlekettiń týýdy yntalandyrý boıynsha sharalaryn qoldaýǵa baǵyttalǵan, dep habarlaıdy Kazinform menshikti tilshisi.
Qujatqa sáıkes, balabaqshalarda qabyldanatyn tólem túrleriniń naqty tizimi bolady. Buǵan bala kútimi jáne mektepke deıingi bilim berý, turý jáne qyzmet kórsetý tólemderi kiredi. Bóbekter toptaryn ashatyn balabaqshalar erte jastaǵy balalarǵa kútim úshin qosymsha tólem óndire alady.
Memlekettik jáne kommertsııalyq emes jekemenshik balabaqshalar úshin oqý jáne turý aqysy memleket tarapynan retteledi. Provıntsııalyq bılik organdary tarıfterdi naqty operatsııalyq shyǵynnan memlekettik sýbsıdııalardy alyp tastaý negizinde belgileıdi.
Kommertsııalyq jekemenshik balabaqshalar óz qyzmetteriniń qunyn derbes anyqtaý quqyǵyn saqtaıdy, biraq bul týraly bilim berý organdaryna habarlaýǵa mindetti bolady. Bılik qajet bolǵan jaǵdaıda baǵanyń negizsiz ósýine jol bermeý úshin shyǵyndar qurylymyna tekseris júrgize alady.
Jańa saıasatta ashyqtyqqa erekshe nazar aýdaryldy. Barlyq balabaqsha alynatyn aqylar týraly aqparatty resmı saıttar men aqparattyq stendterde jarııalaýǵa mindetti. Bekitilgen tizimge kirmeıtin kez kelgen aqyny, sonyń ishinde qosymsha is-sharalardy jáne mektepke qabyldaýǵa baılanysty ata-analardyń erikti qaıyrymdylyqtaryn alýǵa tyıym salynady.
Osyǵan deıin Qytaı mektepke deıingi tegin bilim berý júıesin engizgenin jazǵan bolatynbyz.