Qytaı bala týýdy qoldaý úshin jańa sharalar qabyldady — sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstanda ózin-ózi jumyspen qamtyǵandar sany 4 mıllıonnan asty — ÓzA
2024 jylǵy 1 qazan jaǵdaıy boıynsha Ózbekstanda ózin-ózi jumyspen qamtyǵandar sany 4 mıllıon 83 myń 700 adamǵa jetti. Salyq komıtetiniń habarlaýynsha, qazirgi ýaqytta ózin-ózi jumyspen qamtyǵan adamdardyń 57 paıyzy erler, al 43 paıyzy áıelder, dep habarlaıdy ózbekstandyq «ÓzA» aqparat agenttigi.
Atalǵan BAQ-tyń dereginshe, bul kórsetkish 2023 jylmen salystyrǵanda 86,8 paıyzǵa ósken. Ósý kórsetkishi eń joǵary salalar — turmystyq qyzmet — 133,6 paıyz (987,4 myń adam), óndiris jáne qyzmet kórsetý — 113,5 paıyz (203,5 myń adam), aqparat-kommýnıkatsııa — 96,7 paıyz (51,6 myń adam).
Aımaqtar boıynsha alyp qaraǵanda, alǵashqy úshtikte Samarqand (470 myńnan astam), Qashqadarııa (413 myńnan astam) jáne Tashkent (378 myńnan astam) oblystary kirgen. Jyzaq, Naýaı jáne Syrdarııa oblystary sońǵy oryndarda tur.
«Sonymen qatar, jeńil avtokólikterde jolaýshylar tasymalymen aınalysatyn azamattar sany 611,6 myńdy qurady. Onyń ishinde 344,7 myń adam 2024 jyly tirkelgen», dep jazady «ÓzA».
Sondaı-aq osy aptada «ÓzA»-da «Bıyl metroda qansha jolaýshy tasymaldanǵany belgili boldy» degen taqyryptaǵy aqparat jarııalandy.
Atap aıtqanda, 2024 jyldyń 9 aıynda Tashkent metrosynda qansha jolaýshy tasymaldanǵany belgili bolǵan.
Statıstıka agenttiginiń málimetine sáıkes, 2024 jyldyń qańtar-qyrkúıek aılarynda Tashkent metropolıteninde jalpy 190,1 mıllıon jolaýshy tasymaldanǵan.
Bul kórsetkish 2023 jyldyń sáıkes kezeńimen salystyrǵanda 73,4 mıllıon jolaýshyǵa artqan, ósim qarqyny 162,9 paıyzdy quraǵan.
Aıta keteıik, qazirgi ýaqytta Tashkent metropolıteni 4 jeliden turady, onda 50 stantsııa bar.
Qytaı bala týýdy qoldaý úshin jańa sharalar qabyldady — «Halyq gazeti»
Memlekettik keńestiń bas basqarmasy 28 qazan kúni qujat jarııalap, bala týý, bala kútimi jáne bilim berý shyǵyndaryn azaıtý boıynsha birqatar jańa shara jarııalady.
Bul týraly osy aptada Qytaıdyń «Halyq gazeti» habarlady.
Qytaılyq BAQ-tyń keltirgen málimetterine súıensek, qujatta bala týý qyzmetterin qoldaýdy kúsheıtý, bala kútimine qyzmet kórsetý júıesiniń qurylysyn nyǵaıtý, bilim berý, turǵyn úı jáne jumyspen qamtýda qoldaýdy arttyrý sııaqty sharalar kózdelgen. Sondaı-aq bala týýǵa qolaıly áleýmettik atmosferany qalyptastyrýdyń 4 aspektisi boıynsha 13 naqty shara usynylǵan. Sol arqyly búkil qoǵam balaly bolýdy qurmetteıtin jáne qoldaıtyn jaqsy atmosfera qalyptastyrmaq.
Sondaı-aq osy aptada «Halyq gazeti» basylymynda «Qytaı jylyna 10 myńǵa deıin ushatyn kólik shyǵarmaq» degen taqyryptaǵy habar jarııalady.
Atap aıtqanda ótken jeksenbide Qytaıdyń ońtústigindegi Gýandýn provıntsııasynyń ortalyǵy Gýanchjoýda álemdegi alǵashqy ıntellektýaldy ushatyn kólik shyǵaratyn bazanyń qurylysy bastaldy.
Qytaılyq BAQ-tyń dereginshe, XPENG ushatyn avtokólikterdiń enshiles kásiporny XPENG AEROHT tapsyrys bergen óndiristik baza ushatyn avtomobılderdi shyǵaratyn álemdegi alǵashqy serııalyq zaýyt bolady.
Bazanyń málimetterinshe zaýyt kólemi 180 myń sharshy metr aýmaqty alyp jatyr. Bolashaq joba boıynsha jylyna 10 myń ushatyn kólik shyǵarmaq.
Atalǵan kólik alǵashqy reısin osy jyldyń qyrkúıeginde jasaǵan bolatyn, al alǵashqy satylymy 2024 jyldyń sońynda bastalmaq.
Apta sońyna qaraı «Halyq gazetinde» «Qorǵas erkin saýda aımaǵynda alǵashqy toǵyz aıda ımport-eksporttyń jalpy quny 37 mıllıard ıýannan asty» degen taqyryptaǵy aqparat jaryq kórdi.
Qytaılyq BAQ-tyń keltirgen derekterine súıensek, Bas keden basqarmasynyń statıstıkasyna sáıkes, bıyl qańtar-qyrkúıek aılary aralyǵynda Qorǵas keshendi erkin saýda aımaǵynda ımport pen eksporttyń jalpy quny 37,356 mıllıard ıýanǵa jetip, bir jylmen salystyrǵanda 30,8%-ǵa ósken.
Sóıtip, eldegi 160 keshendi erkin saýda aımaǵynyń ishinde 33-orynǵa jáne Shyńjańdaǵy keshendi erkin saýda aımaqtarynyń arasynda 2-orynǵa ıe boldy.
Belgrad halyqaralyq kitap kórmesinde ırandyq úsh jańa kitap tusaýy kesildi — Parstoday
67-shi Belgrad halyqaralyq kitap kórmesinde serb tiline aýdarylǵan ırandyq úsh kitaptyń tusaýy kesildi, dep habarlaıdy Parstoday aqparat agettigi.
Atalǵan basylymnyń málimetinshe, IIR-nyń Mádenı keńes berý mekemesiniń yntymaqtastyǵymen «Imam Reza — Paıǵambar áýletiniń danasy», «Dıvan Hafız» jáne «Nur» atty úsh ırandyq kitaptyń ashylý rásimi Serbııada, Belgrad halyqaralyq kitap kórmesiniń «ıAvanovıch Zamaı» zalynda ótti.
Bul kitapty Aleksandr Dragovıch aýdaryp, «Serjan Markovıch» baspasynan shyǵarǵan.
Serbııa ádebı birlestiginiń basshysy Nenad Mıloshevıch te osy rásimde Irannyń áıgili aqyny Hafezdiń tulǵasy týraly pikir bildirip, Hafezdiń lırıkasyna yqylasy bólek ekenin aıtty.
Sondaı-aq Mıloshevıch «Dıvan Hafızdiń» Serbııada basylýyn osy uly ırandyq aqyndy serb qoǵamyna tanytýdaǵy qundy qadam dep sanaǵan.
Sonymen qatar «Parstoday»-de «Máskeý halyqaralyq kórmesinde Iran ónerin keńinen qabyldaý» degen taqyryptaǵy aqparat jaryq kórgen bolatyn.
Atalǵan basylymnyń dereginshe, Máskeýde 50 ırandyq sýretshiniń jumystary qoıylǵan halyqaralyq zamanaýı óner kórmesi ótti. Uıymdastyrýshylardyń pikirinshe, bul ırandyq sýretshilerdiń Reseı naryǵyna shyǵýyna jasalǵan qadam bolýy múmkin.
Máskeýde jeksenbi kúni keshke deıin jalǵasqan úsh kúnge sozylǵan kórmede óner súıer qaýym Irannyń zamanaýı ónerimen tanysýǵa múmkindik alǵan.
Parstoday aqparat agenttiginiń habarlaýynsha, Cosmoscow halyqaralyq zamanaýı óner kórmesinde ırandyq sýretshilerdiń týyndylaryna jeke bólim arnalyp, bes stendte 59 sýret pen 9 óner týyndysy qoıylǵan.
Iran Islam Respýblıkasynyń Máskeýdegi elshiliginiń mádenı keńesshisi Masýd Ahmadvand osy kórmede ırandyq týyndylardyń keń kólemde qabyldanýyna toqtalyp, ırandyq sýretshiler óz týyndylarynda ózderiniń tamyry men baı tarıhy men zamanaýı mádenıet úrdisterine baılanysty ulttyq jáne álemdik dańqqa qol jetkizdi, degen.
Iran óneriniń bul kórmesi Máskeýdegi Iran elshiliginiń mádenı keńesimen jáne Reseı men Iran arasynda mádenı dıalog qurý salasynda belsendilik tanytyp júrgen reseılik «Kulturing» kompanııasynyń qoldaýymen ótkizilgen.
Dáriger Jumataı Áýbákiruly memleket tarapynan marapattaldy — Jenmın jıbao
27 qyrkúıek kúni Memlekettik ulttyq birlik pen úlgili tulǵalardy marapattaý jónindegi jınalysy Beıjıńde ótkizilgen bolatyn. Atalǵan memleket dárejeli marapattaýda Іle qazaq avtonomııaly oblysy Tekes aýdanyna qarasty Bozadyr aýyldyq emhanasynyń dárigeri Jumataı Áýbákiruly «Memlekettik ulttar yntymaǵyndaǵy úlgili tulǵa» ataǵyn aldy, dep habarlaıdy Qytaıdyń «Jenmın jıbao» aqparattyq portaly.
Atalǵan BAQ-tyń dereginshe, ol teńiz deńgeıinen 3000 metr bıiktiktegi Bozadyr dep atalatyn malshylar turatyn shalǵaıdaǵy taýly qystaqta 30 jyldaı ýaqyt jerlesteriniń densaýlyǵyna jaýapty dáriger bolyp qyzmet atqarǵan.
Dáriger otbasynda dúnıege kelgen Jumataı ákesiniń jolyn qýyp, dáriger bolýdy tańdaǵan. Ol ótken ǵasyrdyń 90-shy jyldarynyń basynda Qulja qalasynan dárigerlik oqýdy oqyp bitirgennen keıin, Bozadyr aýylyndaǵy emhanaǵa kelip qyzmet isteı bastaıdy. J. Áýbákiruly jumys isteıtin óńirde negzinen mal sharýashylymen aınalysatyn adamdar bolǵandyqtan dárigerlik qyzmetti atqarý barysynda kóptegen qıyndyqtar týyndaıtyn edi.
Qytaılyq BAQ-tyń keltirgen deregine súıensek, Jumataı qystyń qaqaǵan aıazynda, jazdyń shilińgir ystyǵyna qaramastan naýqas qaıda bolsa sonda, kún demeı, tún demeı jerlesteri úshin qaltqysyz eńbek etken aıtýly dáriger bola bilgen. Sondyqtan ol qandaı marapat alsada laıyq deıdi bozadyrlyq jerlesteri.
«Bozadyr malshylary óte baqytty, óıtkeni bizde Jumataı bar», deıdi malshy Jeksenbaı Sultanǵazyuly atty jelesi.
Memleket boıynsha úzdik tulǵa dep 368 azamat tańdalyp, marapattalǵan. Dáriger Jumataı Áýbákiruly sol úzdikterdiń biri bolyp tańdalǵandyqtan, arnaıy memleket beretin syılyqty tapsyryp alý úshin Beıjińge shaqyrylǵan eken.
Adyıamanda 3000 jyl burynǵy 10 eldi meken tabyldy — TRT
Túrkııanyń ońtústik-shyǵysyndaǵy qala Adyıamannyń Kahta aýdanyndaǵy Atatúrik bóget toǵanynyń jaǵasynda júrgizilgen arheologııalyq zertteýler nátıjesinde 3 myń jyl burynǵy qonystaný aımaǵy anyqtaldy.
Bul týraly osy aptada Túrkııa Radıo Televızııa portaly habarlady.
Túrkııalyq BAQ-tyń dereginshe, Adyıaman murajaı basqarmasy qyzmetkerleri Belóren aýyldyq aımaǵyndaǵy bóget toǵanynyń jaǵasyndaǵy tarıhı aımaqtardy anyqtaý úshin zertteý jumystaryn bastady.
Óńirge barǵan arnaıy top aımaqta barlaý jáne qaıyqpen jaǵalardy zertteý arqyly 3000 jyl burynǵy 10 eldi mekendi anyqtaǵan.
Adyıaman murajaıynyń dırektory Mehmet Alkannyń aıtýynsha, munda jartas qalashyqtarynan turatyn 10 eldi mekendi anyqtalǵan. Tabylǵan qysh ydystar sol dáýirde ómir súrgen adamdar bolǵanyn kórsetedi. Sonymen qatar dalalyq zertteý barysynda arna pishindi qýystar men bólme tıpti qonys aımaqtary tabylǵan.
