Qytaı avtokólikterdiń janarmaı shyǵynyn shekteıdi
ASTANA. KAZINFORM – 2026 jylǵy 1 qańtardan bastap Qytaıda jeńil jáne jeńil kommertsııalyq avtokólikterdiń janarmaı shyǵynyn shekteıtin jańartylǵan ulttyq standarttar kúshine endi, dep habarlaıdy Xinhuanet.
Atalǵan jańa erejeler 2026–2030 jyldar aralyǵynda avtokólikterdiń energııa únemdeý kórsetkishterine qoıylatyn talaptardy edáýir qatańdatady.
Dástúrli jáne gıbrıdti jeńil avtokólikter úshin janarmaı shyǵynynyń normalary burynǵy reglamenttermen salystyrǵanda shamamen 18 paıyzǵa tómendetildi. Eń kóp taralǵan segmentke jatatyn, salmaǵy shamamen 1,5 tonna bolatyn avtomatty berilis qoraby bar kólikter úshin jańa shekti kórsetkish 100 shaqyrymǵa 7,74 lıtr.
Jeńil kommertsııalyq avtokólikter úshin janarmaı shyǵynynyń jalpy lımıti 10 paıyzǵa qysqardy. Salmaǵy shamamen 2 tonna bolatyn benzınmen júretin júk kólikteri úshin jańa norma 100 shaqyrymǵa 9,13 lıtr deńgeıinde belgilendi.
Sarapshylardyń pikirinshe, bul sharalardy iske asyrý Qytaı avtokólik ónerkásibin tehnologııalyq jańǵyrtýǵa qýatty serpin beredi. Jańa talaptar tómen kómirtekti ekonomıkaǵa kóshýdi qamtamasyz etip qana qoımaı, janarmaı men elektr energııasyna ketetin shyǵyndardy aıtarlyqtaı azaıtý arqyly avtokólikterdi paıdalanýdy túpki tutynýshylar úshin de tıimdi etedi.
Aıta keteıik, buǵan deıin Qytaıdyń Geely jáne GAC avtokólikteri Reseı naryǵynan ketýi múmkin ekenin jazǵan edik.