Qytaı álemdegi eń úlken sý elektr stantsııasynyń qurylysyn bastady

ASTANA. KAZINFORM – Qytaı bıligi álemdegi eń iri sý elektr stantsııasyna aınalady dep kútiletin mega bóget qurylysy jobasynyń bastalǵanyn habarlady, dep habarlaıdy Kazinform South China Morning Post basylymyna silteme jasap.

Basylymnyń habarlaýynsha, bul álemdegi eń iri joba bolmaq. Onyń jyldyq qýaty 300 mıllıard kılovatt-saǵat elektr energııasyna baǵalanady. Naqtyraq aıtqanda, atalmysh nysan qazirgi ýaqytta álemdegi eń iri dep sanalatyn Sansıa (Úsh shatqal) sý elektr stantsııasynan úsh ese kóp. Jalpy ınvestıtsııa kólemi 1,2 trıllıon ıýan (167,2 mıllıard dollar) shamasynda dep baǵalanyp otyr. 

Beıjiń aldymen Tıbet ústirtiniń gıdroenergetıkalyq áleýetin paıdalaný jónindegi keń strategııanyń bir bóligi retinde 5 jyldyq josparynyń bóligi retinde bógetti 2020 jyly salý strategııasyn jarııalady. Jospar ótken jyldyń jeltoqsanynda bekitilgen. 

ıArlýng Tsangpo ózeniniń tómengi aǵysynda júrgizilip jatqan aýqymdy joba Úndistan men Bangladeshte sýmen qamtamasyz etý jáne qorshaǵan ortaǵa áser etý týraly alańdaýshylyq týǵyzdy. Alaıda Qytaı bul jobanyń qatań ǵylymı saraptamadan ótkenin jáne aǵystyń tómengi jaǵyndaǵy elderdiń ekologııalyq ortasyna, geologııalyq turaqtylyǵyna nemese sý quqyǵyna keri áser etpeıtinin aıtady. 

Qytaı Syrtqy ister mınıstrliginiń málimdeýinshe, joba tabıǵı apattardyń aldyn alýǵa jáne onyń saldaryn azaıtýǵa jáne aǵystyń tómengi jaǵyndaǵy aımaqtardaǵy klımattyń ózgerýine beıimdelýge kómektesýi múmkin. 

Buǵan deıin Qytaı strategııalyq paıdaly qazbalar kontrabandasymen kúresti kúsheıtetinin jazǵan edik.