Qytaı 2030 jylǵa qaraı óz ǵaryshkerlerin Aıǵa ushyrýdy josparlap otyr

ASTANA. KAZINFORM — Qytaı bıligi 2030 jylǵa deıin ǵaryshkerlerdiń Aı betine qonýyn qamtamasyz etýdi maqsat tutyp otyr. Bul baǵytta el Aı mıssııasyna arnalǵan qanatqaqty qarqyndy ǵylymı-zertteý jáne synaq jumystaryn júrgizip jatyr,  dep habarlaıdy Sınhýa.

Qytaıdyń qanatqaqty ǵaryshtyq baǵdarlamalar basqarmasynyń (CMSA) málimetinshe, aldaǵy mańyzdy synaqtardyń qataryna «Lanıýe» qoný modýliniń keshendi synaqtary, «Menchjoý» ǵarysh kemesine arnalǵan jylý jáne aerodınamıkalyq qysym synaqtary, sondaı-aq «Chanchjen-10» (Long March-10) zymyranynyń tómen bıiktiktegi jáne baqylaý ushýlary kiredi.

«CMSA resmı ókili Chjan Tszınbonyń aıtýynsha, kelesi jyly ótetin qoǵamdyq logotıp baıqaýy «Menchjoý-1» ǵarysh kemesi mıssııasyna jáne Qytaıdyń ǵarysh stantsııasyna qatysty jobalarǵa arnalmaq. «Menchjoý-1» negizinen Aı mıssııalaryna, sonymen qatar jer mańyndaǵy orbıtadaǵy ǵarysh stantsııasynyń jumysyna qoldaý kórsetýge arnalǵan», dep jazdy Sınhýa.

Chjan Tszınbonyń málimdeýinshe, pılotty Aı mıssııasyna qatysty barlyq jobalaý jáne qurylys jumystary belgilengen kestege saı júrip jatyr. «Chanchjen-10» zymyran tasyǵyshy, «Menchjoý» ǵarysh kemesi, «Lanıýe» qoný modýli, «Vanıýı» Aı skafandry jáne Aıda júretin «Tanso» tehnıkasy sııaqty negizgi ushý jabdyqtarynyń jobalary daıyndalǵan.

Sondaı-aq ǵylymı zertteý jáne tájirıbelik qoldanýǵa arnalǵan paıdaly júktemelerdiń jobalanýy aıaqtalǵan. Al jerdegi ınfraqurylym — ushyrý alańy, baqylaý jelisi men qoný alańdarynyń qurylysy jedel qarqynmen júrgizilip jatyr.

Sınhýanyń habarlaýynsha, bıyl birneshe synaq sátti óttar ótken eken. Al Chjan Tszınbo kóptegen jańa tehnologııalardyń áli de synaqtan ótkizilip, qoldanýǵa jaramdylyǵy tekserilýi tıis ekenin atap ótken.

Eske sala ketsek, buǵan deıin qytaılyq ǵalymdar ǵaryshqa arnalǵan kir jýǵysh mashına jasap shyǵarǵanyn jazǵanbyz.