Qytaı 1 trln ıýan arnaıy memlekettik oblıgatsııalar shyǵarady

BEIJІŃ. KAZINFORM – Qytaı premer-mınıstri Lı Tsıan 5 naýryzda ótken 14-shi Búkilqytaılyq halyq ókilderi jınalysynyń ekinshi sessııasynda úkimettiń jyldyq jumysy týraly esep berdi.

Lı Tsıan úkimet jumysynyń esebinde ulttyq damýdaǵy keıbir iri jobalardy qarjylandyrý máselesin júıeli túrde sheshý úshin Qytaı úkimeti bıyldan bastap aldaǵy jyldary birneshe ret qatarynan «Asa uzaqmerzimdi arnaıy memlekettik oblıgatsııalar» shyǵarýdy josparlap otyrǵanyn aıtty.

Osy arnaıy memlekettik qaryzdy shyǵarý arqyly alynǵan qarajat tek negizgi ulttyq strategııalardy júzege asyrýǵa jáne negizgi salalardaǵy qaýipsizdik múmkindikterin qurýǵa jumsalatynyn atap ótti. Premer jarııalaǵan esepke sáıkes, Qytaı úkimeti 2024 jyly jalpy nomınaldy quny 1 trıllıon ıýan bolatyn «Asa uzaq merzimdi arnaıy memlekettik oblıgatsııalar» shyǵarady.

«Asa uzaqmerzimdi arnaıy memlekettik oblıgatsııalar» degenimiz ne?

Qytaı 1998, 2007 jáne 2020 jyldary úsh ret «arnaıy memlekettik oblıgatsııalar» shyǵarǵan.

Al «Asa uzaqmerzimdi memlekettik oblıgatsııalardy» (30 jyldyq merzim) shyǵarýy 2001 jyly bastalyp, 2016 jyldan beri shyǵarý kólemi artyp, 2020 jyly 620 mıllıard ıýanǵa jetken. «Asa uzaq merzimdi arnaıy memlekettik oblıgatsııalar» osy eki oblıgatsııanyń ıntegratsııalanǵan túri bolady.

Qytaı buqaralyq aqparat quraldarynyń túsindirmesi boıynsha, «Asa uzaqmerzimdi arnaıy memlekettik oblıgatsııalar» dep atalatyn oblıgatsııalardyń shyǵarylý merzimi 10 jyldan astam ekenin bildiredi. Sonymen qatar bul oblıgatsııalardan túsken qarajat arnaıy jobalarǵa jumsalady jáne ony Qytaıdyń Qarjy mınıstrligi oryndy dep tapqan kezde shyǵarady.

Jergilikti BAQ mundaı arnaıy memlekettik oblıgatsııalardy shyǵarý arqyly Qytaı úkimeti aýqymdy ınfraqurylymdyq jobalar men ulttyq uzaqmerzimdi strategııalyq jobalaryn júzege asyrýǵa tıimdi qoldaý kórsetý úshin bıýdjetten tys qarajatty kóbirek tarta alady dep esepteıdi.