Qysta taýǵa shyqqanda qandaı qaýipsizdik erejelerin saqtaý kerek

ÓSKEMEN. KAZINFORM – Shyǵys Qazaqstan oblysynyń qutqarýshylary qys kezinde taýǵa shyqqanda qandaı qaýipsizdik erejelerin saqtaý kerektigin eske saldy.

ShQO tótenshe jaǵdaılar departamenti baspasóz qyzmetiniń málimetine súıensek, eń áýeli taýda júretin marshrýtty aldyn ala egjeı-tegjeıli zerttep alý qajet. 

- Qar kóshkini qaýpi bar jerlerge barýdan aýlaq bolyńyz, ásirese qar mol jaýǵannan keıin. Jaqyndap kele jatqan kóshkin shýyn estigennen keıin birden 50-100 metr joǵary kóterilý kerek. Eger kóshkin astynda qalsańyz ómirińizge qaýip tónetinin qaperde ustańyz, - delingen aqparatta. 

Qar kóshkini men sel aǵynynan tek qashý arqyly qutylýǵa bolady. 

- «112» jedel jelisinen keletin eskertýlerdi qadaǵalap otyrǵanyńyz jón. Osy qaýipsizdik sharalaryn qoldana otyryp, siz ózińizdiń jáne jaqyndaryńyzdyń ómirin saqtap qala alasyz, - delingen habarlamada. 

Eske salsaq, osyǵan deıin Shyǵys Qazaqstanda qar kóshkini túsirilgeni habarlanǵan.