Qysta sý keship júrip Kentaýdy jylýǵa qosqanbyz - eńbek adamy

TÚRKІSTAN. KAZINFORM - Kentaý qalasynda ornalasqan №5 jylý energo ortalyǵynda bas ınjener bolyp qyzmet atqaratyn Muhtar Muhıtdınovty kópshilik jaqsy tanıdy. Kóshede kórse jylýdyń jaıyn surap, ortalyqtyń jaǵdaıyn biledi.

Muhtar Muhıtdınovtyń jylý energo ortalyǵyna jumysqa kelgenine bıyl 21 jyl tolyp otyr. Qyzmetti qatardaǵy jumysshy bolyp bastaǵan eńbek adamy osy ýaqyt aralyǵynda bas ınjener laýazymyna deıin kóterildi. Eńbektiń túrli satylarynan ótti. Tájirıbesin shyńdap, biliktiligin arttyrdy. 

«Men 2003 jyldan bastap jylý energo ortalyqta jumys istep kelemin. Buǵan deıin elektr dánekerleýshi, qazandyq tsehynyń basshysy qyzmetterin atqardym. Arasynda shahtaǵa baryp jumys istep keldim. Sodan 2007 jyly qalaǵa jylý beriledi bastady. Qanshama jyldan beri toqtap turǵan jylý energo ortalyqty iske qosý ońaıǵa soqpady. Ol kezde Kentaýdaǵy páterlerdiń kópshiligi bos edi. Ieleri basqa qalada. Olardy izdep taýyp, júıelerdi ashý kerek boldy. Ortalyq magıstraldyq júıedegi aqaýlardy túzetý jumystaryn atqardyq. Kún-tún demeı táýlik boıy jumys istedik. Kúnniń sýyǵynda jertólede jarylyp ketken qubyrlardy jalǵadyq. Qar men muzda sý keship júrip, eńbek ettik. Nátıjesinde qanshama jyldan beri jylý almaǵan úılerge ortalyq arqyly jylý berdik» - deıdi ol.

Muhtar Muhıtdınov bıylǵy jyldyń mamyr aıynan bastap jylý energo ortalyqtyń bas ınjerneri bolyp taǵaıyndaldy. Qazir jylý enero ortalyǵynda jóndeýden ótip jatqan qazandyqtardyń jumysyn qadaǵalap, sapaly ári ýaqytyly atqarylýyna basa mán berip keledi.

«Búginde Kentaý qalasyndaǵy «Kentaý Servıs» MKK-na qarasty №5 Jylý elektr ortalyǵyndaǵy tozyǵy jetken qazandyqtardy qaıta qurý jumystary qarqyndy júrgizilip jatyr. Qazirgi ýaqytta 6 qazandyqtyń qaıta qurý jumystary júrgizilýde. Atap aıtqanda, №8,11 qazandyqtar 30 tamyzda aıaqtalsa, №9,10 qazandyqtardy qyrkúıek aıynyń sońynda deıin aıaqtaý josparlanǵan. №7 jáne №12 qazandyqtardyń qaıta qurý jumystary qarasha aıynyń sońyna deıin jalǵasady. Budan bólek, 2 qazandyqqa aǵymdaǵy jóndeý jumystary atqarylýda. №5 qazandyqty jóndeý bıýdjet esebinen, №6 qazandyqty jóndeý demeýshiler esebinen iske asyrylyp jatyr. Jóndeý jumystaryn qyrkúıek aıynyń sońyna deıin aıaqtaý josparlanyp otyr» - dedi ol. 

Muhtar Maqulbekuly jylý energo ortalyqtaǵy jaǵdaıdy jaqsy biledi. Tipti árbir júıeniń jumys jasaýyn jattap alǵan. Qandaı kómir qajet?, qalaı sapaly jylý berýge bolady? - degen máselelerdiń sheshimin ońaı tabady. Árıne, bul kóptegen jyldardan beri jınaqtalǵan tájirıbe ekenin daýsyz.

«Bizge topan kómir kerek. Árbir qazandyq salynatyn kezde sol óńirdegi kómirdiń sapasyna laıyqtalyp jasalady. Sebebi, qyzýyna qaraı esepteledi. Biz kómirdiń shańdatyp jaǵamyz. Qum sııaqty shań bolady. Sony ystyq aýamen úrleý arqyly jylý beremiz. Buryńǵydaı kúrekpen salyp qoıyp, astyn keseýmen shuqalap otyratyn kezeń kelmeske ketti. Al, kópshilik álide solaı túsinedi. «Topan kómir jaǵyp jatyr», «balon jaǵyp jatyr» dep halyq shýlaıdy. Biz qazandyqqa balon sala almaımyz. Úıde dıvanda jatyp alyp aıta beretinder kóp. Olar ortalyqtaǵy tehnologııany túsinbeıdi. Qazir barlyq júıe avtomattandyrylǵan. Soǵan sáıkes mamandardy da oqytyp jatyrmyz. Tipti kúldiń ózi qazandyqtyń astyndaǵy sýǵa túsedi. Ony keseýmen emes, sýmen jýyp shyǵaramyz. Nasostarmen aıdaımyz» - deıdi eńbek adamy.

Búginde jylý energo ortalyqtaǵy qazandyqtar kúl ustaǵyshynan bastap, tóbesindegi murjasyna deıin aýysyp jatyr. 

«Qazirgi tańda ortalyqta 150 –ge jýyq adam jumys isteýde. Jylytý maýsymy bastalǵanda jumysshylar sany 350-den asatyn bolady. Odan bólek, merdiger kompanııada 200-den astam adam jumyldyrylǵan. Jumysshylar kúndizgi jáne túngi aýysymǵa bólingen. Jańadan ornatylyp jatqan qazandyqtardyń keleshekte gazǵa aýystyrýǵa múmkindikter qarastyrylǵan. Aldaǵy ýaqytta gazǵa kóshetin bolamyz. Oǵan deıin kómir tutynamyz» - dedi Muhtar Muhıtdınov. 

Muhtar Maqulbekuly Kentaý qalasynda dúnıege kelgen. Y.Altynsarın atyndaǵy №1 mektepte bilim aldy. Jubaıy ekeýi 4 ul-qyzdy tárbıelep ósirdi. Joǵary bilim berip, uldaryn úılendirip, qyzdaryn uzatty. Qazir eńbek adamy nemerelerinde eńbekpen eseıýge úıretip jatyr.