Qysqy Paralımpıada oıyndaryna Qazaqstan 2 sport túrinen qatysady

ASTANA. KAZINFORM — XIV qysqy Paralımpıada oıyndaryna josparly daıyndyq jumystary júrip jatyr. Bul týraly Týrızm jáne sport mınıstri Erbol Myrzabosynov Úkimette aıtty.

Jarystar 2026 jyldyń 6-15 naýryzynda Italııanyń Mılan jáne Kortına-d'Ampetstso qalalarynda ótedi. Oǵan 665 sportshy qatysady dep josparlanyp otyr, olar 79 medal jıyntyǵyn sarapqa salady. 

Ulttyq komanda 2 sport túrinen – para shańǵy jarysy men para bıatlonnan qatysýdy josparlap otyr. Bul sport túrleri boıynsha 38 medal jıyntyǵy sarapqa salynady.

— Búginge deıin ulttyq komandanyń 7 sportshysy 10 lıtsenzııa jeńip aldy. Olardyń qatarynda parabıatlonnan álem kýbogynyń jalpy esepte jeńimpazy atanǵan tuńǵysh qazaqstandyq jáne Hrýstal globýstyń ıegeri Erbol Hamıtov, 2022 jyly Beıjińde ótken Paralımpıada oıyndarynyń qola júldegeri Aleksandr Gerlıts bar, – dedi E. Myrzabosynov Úkimettiń búgingi otyrysynda.

Mınıstrdiń aıtýynsha, oıyndarǵa sapaly daıyndyqty qamtamasyz etý maqsatynda 6 oqý-jattyǵý jıyny ótkizilgen. 

Joǵary nátıjelerge qol jetkizý úshin para shańǵy sporty jáne parabıatlon boıynsha sheteldik jattyqtyrýshy-keńesshi Roman Petýshkovpen kelisimshart jasalǵan.

Aıta keteıik, elimizde qysqy Olımpıadaǵa daıyndyqqa 13,3 mlrd teńge bólingen.