Qysqy Azııa oıyndary: Qazaqstan short-trekten tarıhı altynǵa qol jetkize ala ma

ASTANA. KAZINFORM - Qysqy Azııa oıyndary tarıhynda Qazaqstan quramasy short-trekten eshqashan altyn medal jeńip almaǵan.

Short-trekshilerdiń enshisinde estafetalyq jarystardan tek úsh qola medal bar. Bul týraly Ulttyq olımpıadalyq komıtet málim etti.

Harbınde ótetin Azııa oıyndarynda ulttyq qurama tarıhty jańartýǵa barlyq kúsh-jigerin salary anyq.

Short-trek — Qysqy Azııa oıyndaryndaǵy eń áserli sport túrleriniń biri. Sonymen qatar ol kútpegen nátıjelerge toly bolǵandyqtan, belgili bir qashyqtyqta jeńimpazdy aldyn ala boljaý múmkin emes. Short-trekshiler jıi táýekelge bel býady. Bul sportshylardyń zaqymdanýyna, qaqtyǵystarǵa jáne penaltıge alyp kelip, sońynda nátıjelerge áser etedi.

Sporttyń bul túri Azııanyń álemdik arenadaǵy aıryqsha oıyp alar ereksheligi. Azıattyq mekteptiń myqtylyǵyn Olımpıadalar men álem chempıonattaryndaǵy ústemdigi dáleldeıdi. Qurlyqtyń basty kóshbasshylary — Ońtústik Koreıa, Qytaı jáne Japonııa.

Sońǵy jyldary Qazaqstan short-trekten aıtarlyqtaı qarqyn aldy. Qazirgi ýaqytta komanda quramynda óte myqty sportshylar bar. Sondyqtan aldaǵy Azııa oıyndarynda bizdiń sportshylarymyz tańǵaldyra alady.

Aıta keteıik, qazirgi ýaqytta short-trekten Qazaqstan quramasynyń enshisinde tek úsh qola medal bar. Bizdiń short-trekshiler alǵash ret 2011 jylǵy Azııa oıyndarynda júldeger atandy. Erler estafetasynda Abzal Ájǵalıev, Aıdar Bekjanov, Nurbergen Jumaǵazıev, Fedor Andreev jáne Artýr Sultanǵalıevten jasaqtalǵan qurama úshinshi oryn aldy. Sol jyly áıelder komandasy da qola medal ıelendi. Júldeni Inna Sımonova, Ksenııa Motova, Darıa Volokıtına jáne Anna Samarına jeńip aldy.

2017 jyly Sapporoda ótken Azııa oıyndarynda áıelder komandasy bul jetistikti qaıtalap, Anastasııa Krestova, Olga Tıhonova, Madına Janbýsınova, Anıta Nagaı jáne Kım Eng Anyń arqasynda taǵy bir qola medalǵa qol jetkizdi.

Jekeleı synda ázirge medaldar joq. Degenmen 2017 jyldan keıin Qazaqstan quramasy turaqty túrde damyp ústinde. Atap aıtsaq, Álem kýbogy kezeńderinde júldeli oryndarǵa ıe boldy. Al Denıs Nıkısha álem chempıonatynda ekinshi oryn aldy. Sonymen qatar Harbınge attanatyn Alına Ájǵalıeva jasóspirimder arasyndaǵy álem chempıonatynda kúmis júlde jeńip alǵan edi. Osylaısha, qazirgi ýaqytta short-trekten Qazaqstan quramasyna úlken úmit artýǵa bolady.

Qyzyǵy, bul sport túrinde Azııadaǵy kóshbasshylar qashyqtyq uzaqtyǵyna qaraı ózgerip turady. Mysaly, 500 metr qashyqtyqtaǵy altyn medaldardyń kóp bóligin Qytaı sportshylary jeńip alǵan. Ońtústik Koreıa ókilderi 1000, 1500 metr qashyqtyqtarda jáne estafetalarda ústemdikke ıe. Japon sportshylary da qalys qalǵan emes. Al Soltústik Koreıa men Qazaqstan quramalarynyń úzdik úshtikke ilinýi sırek kezdesetin jaǵdaı.

Jalpy, Qytaı men Ońtústik Koreıa tek Azııada ǵana emes, álemde de eń myqty quramalardyń qatarynda. Bul elderdiń sportshylary tehnıkalyq sheberligimen jáne kútpegen ádis-tásilderimen erekshelenedi. Sonymen qatar olardyń fızıkalyq daıyndyǵy myqty, tózimdilik jaǵynan da aqsap turǵan joq. Kóptegen sarapshy bul qurama sportshylarynyń keremet burylystar jasaýyn, túrli jaǵdaılarda jyldamdyqty saqtaý qabileti syndy artyqshylyqtaryn atap ótedi.

2017 jylmen salystyrǵanda, Qazaqstan quramasy aıtarlyqtaı kúsheıdi. Óz stıli qalyptasyp, jańa esimder paıda boldy, sheberlik deńgeıi de edáýir artty. Álemdik týrnırlerde qazaqstandyq short-trekshiler endi jaı qatysýshylar emes. Keıbir qashyqtyqtarda olar aldaǵy Azııa oıyndarynyń favorıtteri qatarynda. Ásirese, ótken jylǵy álem chempıonatynan keıin ulttyq quramaǵa degen senimdilik artty.

Ońtústik Koreıa sol chempıonatta sátsizdikke ushyrady. Erler jarysynda koreılikter altynsyz qalyp, tek bir kúmis medalmen shekteldi. Qazaqstan da dál osyndaı nátıjege qol jetkizdi: 500 metr qashyqtyqta Denıs Nıkısha ekinshi bolyp márege jetti. Al Kım Gıl Lı 1500 metr qashyqtyqta birinshi oryn alyp, Koreıa quramasyn qutqaryp qaldy.

Kerisinshe, Qytaı quramasy keremet nátıje kórsetti. Olardyń qorjynynda álem chempıonatynyń qorytyndysy boıynsha tórt altyn medal bar. Al Japonııa 2024 jylǵy chempıonatta birde-bir júldege qol jetkize almady. Degenmen, bul jaǵdaı Azııa oıyndary aldynda quramalardyń myqtylyq jaǵynan teńdigin dáleldeı almaıdy. Kerisinshe, bul derekter short-trektiń qanshalyqty boljap bolmaıtyn sport ekenin ańǵartady.

Eger naqty esimder týraly aıtsaq, Ońtústik Koreıanyń quramynda Pan Djı Von, Chjan Sýnvý, Pak Chan Hek, Gıllı Kım, Sýhı Shım sııaqty sportshylar bar. Qytaı atynan Shaolın Shandor men Shaoang Lıý, Sýn Lon, Lın Sıaotszıýn, Gong Lı, Ize Chjan qatysady. Japonııa quramasy Rına ıAmana, Amı Hıraı, Shogo Mııata jáne Dan Ivasany usynady. Al Qazaqstannan Denıs Nıkısha, Abzal Ájǵalıev, Ádil Ǵalıahmetov, Gleb Ivchenko, ıAna Han, Olga Tıhonova jáne Alına Ájǵalıeva jarysqa túsedi.

Qazaqstan quramasynyń jattyqtyrýshylar shtaby estafetalyq komandalarǵa úlken úmit artyp otyr. Komanda 2011 jylǵy jetistigin qaıtalaýy múmkin. Sol jyly erler men áıelder jarystarynda medaldar enshilegen bolatyn. Nıkısha, Ájǵalıev, Ájǵalıeva, Han jáne Tıhonova jekeleı esepte úzdik úshtikke talasa alady.

Gleb Ivchenkonyń qandaı nátıje kórseteri áli beımálim bolyp otyr. Deı turǵanmen, onyń qazirgi áleýeti joǵary nátıjeler kórsetýge múmkindik beredi. Sondyqtan Harbınde ol ózin tanytýy múmkin.

Tolyq quram kelesi sportshylardan turady:

- Denıs Nıkısha

- Abzal Ájǵalıev

- Mersaıd Jaqsybaev

- Ádil Ǵalıahmetov

- Gleb Ivchenko

- Aıbek Nasen

- Olga Tıhonova

- ıAna Han

- Malıka Ermek

- Alına Ájǵalıeva

- Madına Janbýsınova

- Zeınep Qumarqan

Qazaqstan quramasy Astanada jattyǵyp jatyr, daıyndyqtar «Alaý» muz aıdynynda ótýde. Bas bapkerdiń esepteýi boıynsha, sportshylar osy maýsymda tolyq áleýetin ashyp, Azııa oıyndary jaqyndaǵanda babynda bolýy tıis.

Buǵan deıin olar álem kýbogy kezeńderinde daıyndyq jasap, jarysqa shyǵyp kórdi. Osy jaǵdaıda da joǵary nátıjelerge qol jetkizdi. Atap aıtqanda, Nıkıshanyń A fınalyna shyǵýy men áıelder quramasynyń estafetada qola medalǵa ıe bolýy. Jalpy, bizdiń short-trekshilerimizdiń bolashaǵy óte jarqyn. Eń bastysy — qashyqtyqta qatelikterge jol bermeý.

Eske salsaq, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi. Sportshylar 11 sport túri boıynsha 64 medal jıyntyǵyn sarapqa salady. 

QR Týrızm jáne sport mınıstrliginiń habarlaýynsha, Qazaqstannan 139 sportshy el namysyn qorǵaıdy. 

Osyǵan deıin qysqy Azııa oıyndary tarıhynda alǵashqy altyn medal jeńip alǵan qazaqstandyq sportshy týraly jazǵan edik.