Qys mezgilinde qandaı dárýmen ishken durys – dáriger keńesi
ASTANA. KAZINFORM – Qys mezgilinde kún sáýlesiniń az túsýine baılanysty D dárýmeni tapshylyǵy jıi baıqalady. Bul súıek, bulshyqet jáne ımmýndyq júıeniń álsireýine ákelýi múmkin. Bul týraly jalpy tájirıbe dárigeri Aqbaıan Nurqabylqyzy túsindirdi.
Dárigerdiń aıtýynsha, D dárýmeni kaltsıı men fosfordyń aǵzaǵa durys sińýine tikeleı áser etedi. Bul elementter jetispegen jaǵdaıda súıek tininiń álsireýi, tis pen bulshyqet problemalary, ımmýnıtettiń tómendeýi baıqalady.
– Elordada qys mezgili uzaq, sodan adamdarǵa kún sáýlesi az túsedi. Sondyqtan D dárýmeniniń tapshylyǵy jıi kezdesedi. Onyń alǵashqy belgileri – sharshaý, álsizdik, kúızelis, bulshyqet aýyrýy, tis pen tyrnaqtyń álsireýi. D dárýmenin bir ret kóterip qana qoımaı, ony turaqty túrde qoldap otyrý qajet. Sebebi taǵam arqyly kúndelikti qajetti mólsherdi tolyq alý qıyn. Ol balyqta, jumyrtqanyń sarysynda, sút ónimderinde bolǵanymen, barlyǵy birdeı olardy kúnde tutyna bermeıdi, – dedi dáriger Jibek Joly telearnasynyń Búgin LIVE baǵdarlamasynda.
Maman profılaktıkalyq jáne emdik dozanyń aıyrmashylyǵyna da toqtaldy. Onyń aıtýynsha, zerthanalyq taldaý nátıjesi 10-30 aralyǵynda bolsa, bul dárýmen tapshylyǵy sanalady jáne emdik doza taǵaıyndalady. Al 50-100 aralyǵy qalypty kórsetkishke jatady, 100-den joǵary deńgeı gıpervıtamınoz qaýpin týdyrady.
Dáriger D dárýmenin Magnıı jáne Omega-3 maı qyshqyldarymen birge, tańǵy as kezinde qabyldaǵan durys ekenin aıtty.
Sonymen qatar egde jastaǵy adamdarda, artyq salmaǵy bar azamattarda, sondaı-aq asqazan-ishek joly, baýyr men búırek aýrýlary bar naýqastarda D dárýmeniniń sińýi tómendeıdi. Balalarda onyń jetispeýi rahıt (meshel) aýrýynyń damýyna sebep bolýy múmkin.
– Qyrkúıek aıynan mamyrǵa deıin profılaktıka retinde qabyldaýǵa bolady. Eresekter úshin táýliktik profılaktıkalyq doza – 600–2000 halyqaralyq birlik, al balalarǵa 400 halyqaralyq birlik mólsheri usynylady. Eń bastysy – mólsherden asyrmaý, – dedi Aqbaıan Nurqabylqyzy.
Aıta keteıik, buǵan deıin kúnnen qorǵaıtyn kremniń D vıtamıni mólsherine áseri jaıly jazǵan edik.