«Kırovtan» keler qaýip bar ma? - baspasózge sholý
***
Sońǵy kezderi áleýmettik jelilerde qyrǵyz elindegi «Kırov» sý qoımasynyń qıyn jaǵdaıy týraly aqparattar jıi boı kórsetip júr. Shynynda Taraz qalasynan nebári 40 shaqyrym qashyqtyqta ornalasqan bul sý qoımasynyń jaǵdaıy jergilikti turǵyndardy ájeptáýir alańdatyp júrgeni jasyryn emes eken. Bul týraly «Egemen Qazaqstan» gazeti jazyp otyr. «Bıylǵy kóktemde jaýyn-shashyn mol boldy. Maýsym aıynyń basynda kún qatty ysyp ketkenimen ortasyna taman qaıtadan jaýyn quıyp, eldi biraz ábigerge saldy. Sol kúnderi qyrǵyz eliniń taýly aımaqtarynda burshaq jaýyp, jańbyr quıyp, odan aqqan sý «Kırov» sý qoımasynyń erneýin toltyra bastady. Bul árıne, qaýipti tipten kúsheıtip jiberdi» dep jazady basylym. Gazet tilshisimen áńgimelesken Jambyl oblysy ákiminiń orynbasary Abdaly Nuralıev: «Kırov» sý qoımasynyń jalpy syıymdylyǵy 550 mln. tekshe metrdi quraıdy. Sońǵy jaýyn-shashynnan keıin sý deńgeıi 540, 48 mln. tekshe metrge deıin jetkeni ras. Óıtkeni, sońǵy aptalarda Qyrǵyzstannyń Talas oblysynyń taýly aımaqtarynda jaýyn-shashyn mol túsip, sý qoımasyna sekýndyna 244 tekshe metr sý quıylyp jatty. Qyrǵyz mamandarynyń aıtýyna qaraǵanda, mundaı telegeı-teńiz sýdyń aǵyp kelýi buryn-sońdy bolmaǵan eken», degen.
Bul týraly tolyǵyraq «Egemen Qazaqstan» gazetininiń búgingi sanynda jaryq kórgen «Kırovtan» keler qaýip bar ma?» atty maqaladan oqı alasyzdar.
Sondaı-aq, «Egemen Qazaqstan» gazeti Shahtınsk turǵyndarynyń qýanyshy týraly habarlap otyr. «Qasıetti Ramazan aıynda jáne Astana kúnin merekeleý qarsańynda Qaraǵandy oblysynyń Shahtınsk qalasynda 26 otbasy jańa baspanaǵa ıe boldy. Uzaq jyldardan beri kezekte turǵandarǵa qala ákimi Serjan Aımaqov pen qalalyq máslıhattyń hatshysy Jamala Mamerhanova páterlerdiń kiltin tabystady» dep habarlaǵan basylym. Bul týraly tolyǵyraq «Jańa qonysqa jaıǵasty» degen maqaladan oqı alasyzdar.
***
«Ekspress K» basylymynyń habarlaýynsha, Batys Qazaqstan oblysynda bes adamdy Sırııaǵa «attandyrǵan» jergilikti «djamaat»-tyń basshysy alty jylǵa sottaldy. «Bes qazaqstandyqtan basqa, Sırııaǵa barýǵa daıyndalyp júrgen taǵy birneshe adam Qazaqstannan shyqpaı jatyp ustaldy. 2016 jyldyń basynan beri óńirdiń quqyq qorǵaýshylary terrorızmdi nasıhattaǵandarǵa qatysty eki qylmystyq is qozǵaǵan» dep jazady basylym. Bul týraly tolyǵyraq «Lıazg damasskoı stalı» degen maqaladan oqı alasyzdar.
***
«Kazahstanskaıa pravda» basylymynyń habarlaýynsha, Qazaqstan qymyz alatyn tehnologııa jasap, qymyzdan neshe túrli ónim alǵan álemdegi alǵashqy memleket.
«Qazaq taǵamtaný akademııasy bıe sútinen jasalǵan ıogýrt, balmuzdaq, tipti, tort pen shokolad, bas aıaǵy 15 túrli ónim usynyp otyr. Akademııa «Taıbýryl» ulttyq taǵam ortalyǵynyń ashylýynda osy ónimderin elge kórsetti» dep jazady basylym. Gazettiń habarlaýynsha, Qazaq taǵamtaný akademııasynyń prezıdenti Tóregeldi Sharmanov bul ónimder biregeı ekenin aıtqan. Bul týraly tolyǵyraq «Kazahstanskaıa pravda» gazetiniń búgingi sanyndaǵy «Kýmysnaıa lıneıka» atty maqalasynan oqı alasyzdar.
