Qyrkúıekte Ulttyq qordan 357 mlrd teńge alynǵan

ASTANA. KAZINFORM – Qarjy mınıstrligi Ulttyq qordyń 9 aıdaǵy túsimderi týraly málimet jarııalady.

2025 jyldyń basynda Ulttyq qorda 34 trln 730 mlrd 106 mln 884 myń teńge aqsha bolǵan. Al 1 qazanda bul soma 35 trln 837 mlrd 822 mln 453,9 myń teńge bolǵan.

Aıta ketý kerek, mınıstrliktiń 1 qyrkúıektegi málimetinde Ulttyq qorǵa 36 trln 105 mlrd 858 mln 875,8 myń teńge túskeni aıtylǵan bolatyn. Budan bir aıdyń ishinde jalpy túsim 268 mlrd teńgege azaıyp ketkenin kórýge bolady. Sebebi qyrkúıek aıynda Ulttyq qordan jumsalǵan aqsha kólemi 1 qyrkúıekte shamamen 3 trln 863 mlrd 34 mln 763,7 myń teńge bolsa, 1 qazanda 4 trln 220 mlrd 48 mln 334,2 myń teńgege jetken. Buǵan qarap qyrkúıek aıynda Ulttyq qordan 357 mlrd 13 mln teńge jumsalǵanyn kóremiz. Onyń 355 mlrd teńge maqsatty transfertke, qalǵan 2 mlrd teńgeden astamy qordy basqarý men jyl saıynǵy aýdıt shyǵyndaryna ketken.

Ulttyq bank qazan aıynda Ulttyq qordan 600–700 mln dollar satýdy josparlap otyr.