Kırkorov pen Leps astanalyqtardy Konstıtýtsııa kúnimen quttyqtaıdy
30 tamyzda Qazaqstannyń mańyzdy memlekettik merekeleriniń biri - QR Konstıtýtsııasy kúni atalyp ótedi.
Merekege oraı uıymdastyrylǵan qazaqstandyq estrada juldyzdarynyń kontserti qala ákimdigi mańyndaǵy alańda óz kórermenderin kútedi. Onda Ǵadilbek Janaı, Dastan Orazbekov, Gúlnur Orazymbetova, Beıbit Qorǵan, Marjan Arapbaeva, Almas Kishkenbaev syndy óner juldyzdary Astana turǵyndary men qonaqtaryna merekelik kóńil-kúı syılaıdy. Shara saǵat 18.00-de bastalyp, 23.00-ge deıin jalǵasady.
Konstıtýtsııa kúnine arnalǵan kontserttik baǵdarlamalar «Dýmandy Saryarqa» baǵdarlamasy sheńberinde Astana mańyndaǵy barlyq aýdandarda jalǵasyn tabady. Tanymal oryndaýshylar, bı jáne mýzykalyq ujymdar, elordalyq qýyrshaq teatrynyń artısteri, anımatorlar jáne tsırk artısteri qala mańyndaǵy 10 turǵyn alapta - Prıgorodnyı, Internatsıonalnyı, Mıchýrıno, Kúıgenjar, Óndiris, Jeleznodorojnyı, Úrker, Kóktal, Promyshlennyı jáne Kazgorodokta qyzyqty oıyn-saýyq ótkizedi. Kontsertterdi saǵat 15:00-den 19:00-ge deıin tamashalaýǵa bolady.
Aıta keteıik, 1 maýsymnan beri qala mańynda uıymdastyrylyp júrgen «Dýmandy Saryarqa» kontsertteri 2 qyrkúıekke deıin jalǵasady. Sharalar ashyq alańdarda tegin ótedi.
Sáken Seıfýllın atyndaǵy mýzeıde QR Konstıtýtsııasy kúnine arnalǵan «Ata zań - azattyqtyń altyn arqaýy» atty kórme ashyldy. Ekspozıtsııa saǵat 10:00-nan 18:00-ge deıin ótedi jáne 31 tamyzǵa deıin jalǵasady. Sonymen birge, «ALJIR» mýzeıi men Táýelsizdik saraıynda da taqyryptyq keshter ótedi.
Odan bólek, 29 tamyzda Konstıtýtsııa kúnine oraı «Barys Arena» muz aıdyny saraıynda «Astana Daýysy» ekinshi halyqaralyq festıvali ótedi. Shara aıasynda álemniń túrli memleketteriniń qazirgi zamanǵy mýzyka oryndaýshylaryna músinsheler tabystaý rásimi ótedi. Sahna tórinde «Evrovıdenıe-2012» baıqaýynyń jeńimpazy Loreen, Intars Býsýlıs, SEVAK, Sogdıana, ALEKSEEV, Grıgorıı Leps, Anı Lorak jáne Fılıpp Kırkorov, sondaı-aq Grýzııa, Shvetsııa, Latvııa, Moldova, Armenııa, Ózbekstan, Ýkraına, Reseı jáne Qazaqstannyń mýzykalyq reıtıngterde kósh bastaǵan artısteri óner kórsetedi. Bılet quny - 1000-15000 teńge aralyǵynda bolmaq.