Qyrǵyzstannyń halyqaralyq rezervteri alǵash ret 10 mlrd dollardan asty

ASTANA. KAZINFORM — Qyrǵyzstan Prezıdenti Sadyr Japarov «Yntymak Ordo» saraıynda ótken respýblıkalyq keńeste eldiń halyqaralyq rezervteri alǵash ret 10 mlrd AQSh dollarynan asqanyn habarlady, dep jazady Kabar.

Memleket basshysy sońǵy jyldary Qyrǵyzstannyń qarjylyq turaqtylyǵy jańa deńgeıge kóterilgenin atap ótti.

— Qyrǵyzstannyń halyqaralyq rezervteri alǵash ret 10 mlrd dollardan asty. Bul bizdiń eldiń makroekonomıkalyq turaqtylyǵynyń, ulttyq valıýtanyń beriktiginiń jáne bolashaqqa senimdiliktiń strategııalyq qory. 2025 jyly jetekshi halyqaralyq reıtıngtik agenttikter Qyrǵyzstannyń sýverendi kredıttik reıtıngin «B+» deńgeıine kótergenin habarlady. Bul qadam bizdiń eldiń ınvestıtsııalyq tartymdylyǵyn arttyrýǵa mańyzdy serpin berdi, — dedi Sadyr Japarov.

«Yntymak Ordo» saraıynda ótken respýblıkalyq keńeske premer-mınıstr, mınıstrlikter basshylary, oblystardaǵy Prezıdenttiń ókilderi, Bishkek pen Osh qalalarynyń merleri jáne aýdan ákimderi qatysty.

Budan buryn Qyrǵyzstan prezıdenti kúsh-qýat qurylymdaryn bızneske qysym jasaýdy toqtatýǵa shaqyrǵanyn jazǵan bolatynbyz.