Qyrǵyzstanda jyl basynan beri ınflıatsııa 1 paıyzdy qurady

ASTANA. KAZINFORM – Qyrǵyzstanda aǵymdaǵy jyldyń qańtar-aqpan aılarynda 2023 jyldyń jeltoqsanymen salystyrǵanda tutyný baǵasy men tarıfteriniń ósýi 1%-dy qurady.

Qyrǵyzstan Respýblıkasy Ulttyq statıstıka komıtetiniń málimetinshe, alkogol jáne temeki ónimderiniń baǵasy 1,6 paıyzǵa, azyq-túlik ónimderi men alkogolsiz sýsyndar 1 paıyzǵa, halyqqa kórsetiletin qyzmet tarıfteri 2,6 paıyzǵa ósti. Bul rette azyq-túlik emes taýarlardyń baǵasy, kerisinshe, 0,3%-ǵa tómendedi.

Aǵymdaǵy jyldyń qańtar-aqpan aılarynda tutyný baǵalary men tarıfteriniń kóterilýi respýblıkanyń barlyq aımaqtarynda baıqalǵan, tek Shý jáne Jalal-Abad oblystarynda tıisinshe 0,5% jáne 0,2% tómendeýi baıqalǵan. 

Bishkekte baǵanyń maksımaldy 1,5%-ǵa kóterilýi basqa aımaqtarmen salystyrǵanda halyqqa kórsetiletin qyzmet tarıfteriniń 4%-ǵa joǵarylaýyna baılanysty boldy. 

2024 jyldyń qańtarynda Qyrǵyzstannyń syrtqy jáne ózara taýar saýdasynyń kólemi 1,2 mlrd AQSh dollardy qurady. Bul kórsetkish 2023 jyldyń qańtarymen salystyrǵanda 36,8%-ǵa ósti.

Bul rette eksport 46,6%-ǵa, ımport 35,1%-ǵa ósken. EAEO-ǵa múshe memlekettermen ózara saýda kólemi 278,3 mln AQSh dollaryn qurap, 2023 jyldyń qańtarymen salystyrǵanda 4%-ǵa tómendedi. Osy kezeńde respýblıkanyń ózara saýdasynyń eń kóp úlesi Reseıge – 70% jáne Qazaqstanǵa – 27,6% tıdi.