Qyrǵyzstanda zeınet jasyn uzartpaıtyn boldy

«Biz zeınet jasyn kóterýdi josparlap otyrǵan joqpyz», - dedi Qyrǵyzstan Parlamenti komıtetiniń otyrysynda Áleýmettik qor basshysy Baqtııar Álıev. Kazinform agenttigi bul týraly Kabar aqparat agenttigine silteme jasap habarlaıdy. 

Onyń aıtýynsha, zeınetkerlikke shyǵý jasy áıelder úshin 58 jas, al er adamdar úshin 63 jas bolyp qaldy.

«Dúnıejúzilik densaýlyq saqtaý uıymynyń málimetinshe, sońǵy 15 jylda ortasha ómir súrý uzaqtyǵy 4 jylǵa uzardy. Bul kórsetkish Qyrǵyzstanda da artqan. Sońǵy 20 jylda elimizde 80 jastan asqan 2 myńnan astam adam ómir súrse, qazir 58 myńnan astam adam bar», - dedi ol.

Ol ortasha ómir súrý uzaqtyǵynyń artyp kele jatqanyn, bul Áleýmettik qordyń zeınetaqyny uzaq merzim tóleıtinin bildiretinin atap ótti.