Qyrǵyzstanda tsıfrlyq som qabyldaýdan bas tartqandarǵa aıyppul salynady

ASTANA.KAZINFORM — Elde tsıfrlyq som qabyldaýdan bas tartqandarǵa aıyppul salýdy qarastyratyn zańnamalyq túzetýler qabyldandy, dep habarlaıdy QazAqparat agenttiginiń menshikti tilshisi.

Qyrǵyzstan prezıdenti Sadyr Japarov «Keıbir zańnamalyq aktilerge Qyrǵyz Respýblıkasyndaǵy ulttyq tsıfrlyq valıýta — tsıfrlyq somnyń quqyqtyq mártebesi máseleleri boıynsha ózgerister men tolyqtyrýlar engizý týraly» zańǵa qol qoıdy.

Qujatqa sáıkes, Qyrǵyz Respýblıkasynyń tsıfrlyq somyn tólemge qabyldaýdan bas tartý jeke tulǵalarǵa 30 eseptik kórsetkish (3 myń som), zańdy tulǵalarǵa 130 eseptik kórsetkish (13 myń som) mólsherinde aıyppul salýǵa ákep soǵady. Sondaı-aq, zań zańdy tulǵalar men jeke kásipkerlerdiń fırmalyq ataýlarynda «tsıfrlyq som» jáne «tsıfrlyq som platformasy» sózderin qoldanýǵa tyıym salady.

Aıta keteıik, tsıfrlyq som — Qyrǵyz Respýblıkasynyń aýmaǵyndaǵy zańdy tólem quraly sanalatyn tsıfrlyq nysandaǵy Qyrǵyz Respýblıkasynyń ulttyq valıýtasy.

Sondaı-aq «Qyrǵyz Respýblıkasynyń Ulttyq banki týraly» konstıtýtsııalyq zańǵa túzetýler qabyldanyp, ulttyq tsıfrlyq valıýta «tsıfrlyq somnyń» tájirıbelik úlgisiniń pılottyq jobasy iske qosyldy.

Buǵan deıin habarlanǵandaı, Qazaqstanda «QazAvtoJol» jol salasyndaǵy jumystardyń ashyqtyǵyn qamtamasyz etý maqsatynda tsıfrlyq teńgeni engizilgen bolatyn.