Qyrǵyzstanda tabıǵı sýsyndarǵa salynatyn aktsızdik salyq tómendetildi
ASTANA. KAZINFORM — Qyrǵyzstan Mınıstrler kabıneti otandyq tabıǵı sýsyn óndirýshilerin qoldaýǵa baǵyttalǵan qaýly qabyldady, dep habarlaıdy Kabar.
Qujatqa sáıkes, 2025 jyldyń 15 mamyrynan bastap aktsızdik salyq mólsherlemesi 1 somǵa deıin tómendetildi. Bul sheshim qyrǵyzstandyq aýyl sharýashylyǵy óndirýshilerinen satyp alynǵan jemis-jıdekter men keptirilgen jemister qosylǵan tabıǵı sýsyndarǵa qatysty. Atap aıtqanda, kompot, sherbet, nektar jáne mors sııaqty ónimderge.
Qaýlyǵa sáıkes, 2025 jyldyń 15 mamyrynan bastap aktsızdik salyqtyń jeńildetilgen mólsherlemesi – 1 lıtr 1som kóleminde belgilendi. Bul shara ónimniń ózindik qunyn tómendetip, ishki jáne syrtqy naryqtardaǵy básekege qabilettiligin arttyrýǵa, sondaı-aq aýyl sharýashylyǵy ónimderin qaıta óńdeý men eksporttaý kólemin arttyrýǵa baǵyttalǵan. Bul maqsattar 2024 jylǵy 22 shildede qabyldanǵan Qyrǵyz Respýblıkasy Prezıdentiniń № 202 Jarlyǵynda kórsetilgen.
Qujat Memlekettik salyq qyzmeti jáne Sý resýrstary, aýyl sharýashylyǵy jáne qaıta óńdeý ónerkásibi mınıstrligimen birlese otyryp ázirlengen. Qoǵamdyq talqylaý barysynda bul qaýly Jogorký Kenesh depýtattarynyń jáne agrobıznes ókilderiniń pikirleri eskerile otyryp jetildirildi.
Aktsızdik salyqtyń tómendetilýi – tabıǵı sýsyndardy óndirýdi turaqty damytý jolyndaǵy mańyzdy qadam. Bul sheshim arqyly tabıǵı kompottar, nektarlar men morstar halyq úshin qoljetimdi bola túsedi, al qyrǵyz fermerleriniń ónimine suranys artady.
Osyǵan deıin Qyrǵyzstanda barlyq esep aıyrysý sommen júrgiziletini aıtyldy.