Qyrǵyzstanda eki kúndik halyq quryltaıy bastaldy
Bishkekte Qyrǵyz Respýblıkasynyń prezıdenti Sadyr Japarovtyń qatysýymen eki kúndik Halyq quryltaıy bastaldy, dep habarlaıdy Kazinform.
Oǵan 700 delegat qatysyp jatyr, olardyń qatarynda respýblıkanyń barlyq oblystarynan - 640 adam, túrli etnostyq toptardan - 30, sheteldik eńbek mıgranttarynan - 30 delegat, sondaı-aq, Jogorký Kenesh depýtattary, mınıstrler kabınetiniń músheleri, memlekettik organdar men jergilikti ózin-ózi basqarý organdarynyń ókilderi qatysýda.
Qyrǵyz Respýblıkasynyń Prezıdenti Sadyr Japarov ekinshi halyq quryltaıyna qatysýshylar aldynda sóz sóılep, quryltaıdyń ashyqtyq pen jaýapkershilik qamtamasyz etýde jáne árbir azamattyń memleket damýyna atsalysýyna múmkindik beretin myqty qural retindegi mańyzdylyǵyn atap ótti.
- Halyqtyq quryltaı – memlekettik basqarýdyń ashyqtyǵy men eseptiligin qamtamasyz etetin qýatty qural. Halyqtyq quryltaı kózqarastar men pikirlerdiń alýandyǵyna baılanysty memlekettik mańyzy bar ózekti máselelerdi talqylaýǵa jáne reformalardy ilgeriletý boıynsha birlesken usynystar ázirleýge múmkindik beredi. Halyq quryltaıynyń dıalog quraly retindegi tıimdiligi bıliktiń kóterilgen máseleler men onda aıtylǵan pikirlerge qanshalyqty nazar aýdaratynymen baılanysty.
Búgingi jalpyulttyq jıynǵa barlyq ákimshilik aýdandar men qalalardyń, konfessııalyq uıymdar men eńbek mıgranttary, halyq arasynan konkýrstyq negizde iriktelip alynǵan, qoǵam ómirindegi máselelermen tanys, olardy sheshý jolynda ózindik kózqarasy bar tulǵalar qatysyp jatyr dep oılaımyn.
Osy sátti paıdalana otyryp, Halyq quryltaıyna eldiń damýyna úles qosyp, oı-pikirimen bólisý nıetimen syrttan kelgen qandastaryma qurmet pen alǵys aıtqym keledi. Quryltaıdyń róli men ornyna salmaqty mán berý – demokratııamyzdyń talaby. Bul árbir azamattyń memlekettiń qalyptasýy men damýyna qatysýyna múmkindik beretin mehanızm. Bul mehanızm jyldar ótken saıyn jetildiriledi dep senemin. Urpaqtan urpaqqa jalǵasyp kele jatqan, halqymyzdyń úni estiletin mańyzdy ınstıtýtty paıdalana bastaǵanymyzdy maqtan tutamyn», – dedi Qyrǵyz Respýblıkasynyń Prezıdenti S.Japarov.
Qyrǵyzstan basshysy ótken jyly qabyldanǵan Halyqtyq quryltaı qarary boıynsha atqarylǵan jumystardyń qorytyndysyn baıandady. 3182 tarmaqtan turatyn is-sharalar josparynyń 68-i sot-quqyqtyq, 1548-i áleýmettik-ekonomıkalyq, 313-i jer, 1253-i túrli ekonomıkalyq máselelerge qatysty boldy. Onyń 358-i oryndalǵanyn, 2200-i oryndalý satysynda, 523-i belgilengen merzimde oryndalmaǵany atap ótildi.
Osh oblysy, Qara-Sý aýdany, Qyzyl-Qyshtaq aýdandyq aımaǵynan kelgen delegat Dilmurad Rahmanov tilshige bergen suhbatynda ózekti máselelerdi kóterip otyrǵan bul jıynǵa ekinshi jyl qatarynan qatysyp otyrǵanyn aıtty. Onyń oıynsha, bul shara halyq pen memleket basshysy arasyndaǵy baılanysty jaqyndatatyn qural. Ol óz okrýginiń turǵyndary atynan jyldar boıy sheshimin tappaı kele jatqan máselelerdi kóterýdi josparlap otyr.
- Quryltaıda burynǵy Tıýlıýken aýrýhanasynyń bazasynda terapııa bólimi men balalar bólimshesin salýǵa qatysty túıtkildi máselelerdi aıtýdy josparlap otyrmyn. Aýdanymyzdaǵy halyq sany 50 myń adamdy quraıdy, sáıkesinshe naýqastar sany da kóp. Ekinshi másele, demografııalyq ósimdi eskere otyryp, aldaǵy ýaqytta aýdanda qosymsha mektepter salý. Qurylys kompanııalaryn kópqabatty úılerden bólek kommýnaldyq jáne áleýmettik ınfraqurylymdar salýdy mindettep, máseleni jergilikti bılikke qaldyrmaý kerek. Jyl sanap oqý oryndaryndaǵy oryn tapshylyǵy kúsheıip kele jatqan Sýra-tash, Kommýnıst, Andıjan, Ishkavan aýyldarynda mektep salý qajet. Úshinshi másele eldegi ákimshilik-aýmaqtyq reformaǵa qatysty, Qyzyl-Qyshtaq aýyldyq keńesiniń halqy Osh qalasynyń quramyna kirýden bas tartty. Osyǵan baılanysty olar prezıdentten halyqtyń pikirine mán berip, turǵyndar úshin sheshim qabyldamaýyn suraıdy. Osh qalasyna qosylǵan jaǵdaıda oblys halqy jer ýchaskelerinen aıyrylyp qalýdan, sondaı-aq óz aımaǵynyń ınfraqurylymyn damytýǵa baǵyttalǵan bıýdjettik qarajatty jetkiliksiz alýdan qorqady. Halyqtyń qorqynyshyn durys túsinip, saıası qysymsyz birlesip sheshý kerek», - dep túıindedi sózin delegat.
Sondaı-aq D.Rahmanov bul kezdesýdiń nátıjesi memlekettik organdardyń áreketine baılanysty bolatynyn aıtty.
Esterińizge sala keteıik, Qyrǵyzstandaǵy Halyq quryltaıy 15-16 jeltoqsan kúnderi ótedi, ekinshi kúnniń qorytyndysy boıynsha qarar qabyldaý josparlanýda.
