Qyrǵyzstanda keneler maýsymy bastaldy

BІShKEK. KAZINFORM — Qyrǵyzstanda kene shaǵýdyń 17 jaǵdaıy tirkeldi, dep habarlaıdy Kazinform-nyń Bishkektegi menshikti tilshisi. 

Aýrýlardyń aldyn alý jáne memlekettik sanıtarlyq-epıdemıologııalyq qadaǵalaý departamentiniń málimetinshe, kenelerdiń belsendiligi ádette sáýir aıynyń sońynda nemese mamyr aıynyń basynda sharyqtaıdy, biraq bıyl aýa raıy jyly bolǵandyqtan olardyń maýsymdyq belsendiligi naýryz aıynyń sońynda bastaldy. Ótken jyly kene shaǵýdyń 713 oqıǵasy tirkeldi, al bıylǵy maýsym basynda 17 adam zardap shekken. 

Vedomstvo kene shaǵý birqatar qaýipti aýrýlardyń damýyna ákelýi múmkin ekenin, olardyń eń aýyry — kene entsefalıti ekenin eske salady. Bul aýrý ortalyq júıke júıesine áser etip, uzaq merzimdi múgedektikten ólimge deıin aýyr zardaptarǵa ákelýi múmkin.

Adamdarǵa dalada júrgende ashyq tústi, jabyq, tar jeńdi kıim kııý, serýendeý kezinde jáne odan keıin kıimderin jáne deneniń ashyq ýchaskelerin únemi tekserip otyrý, repellentterdi qoldaný usynyldy.

Osyǵan deıin Almatyda kenelerge qarsy dezınsektsııalyq óńdeý jumystary bastalǵanyn jazdyq.